काठमाडौं । विज्ञान, प्रविधि तथा नवप्रवर्तन मन्त्रालयले आफ्नो नयाँ संगठन संरचना तथा दरबन्दी तेरिज स्वीकृत गर्दै औपचारिक दर्ताका लागि राष्ट्रिय किताबखानामा पठाएको छ। यससँगै संगठन संरचना तथा दरबन्दी तेरिज स्वीकृत गरी दर्ता गर्ने दोस्रो मन्त्रालयका रूपमा विज्ञान, प्रविधि तथा नवप्रवर्तन मन्त्रालय स्थापित भएको छ।

बिज्ञापन

राष्ट्रिय किताबखानाका महानिर्देशक श्रवणकुमार पोखरेलका अनुसार मन्त्रालयबाट पठाइएको संगठन संरचना तथा दरबन्दी तेरिज आजै प्राप्त भएको र ‘द्रुत प्रक्रिया’ (फास्ट ट्र्याक) मार्फत सोही दिन दर्ता सम्पन्न गरिएको छ। उनले संगठन तथा व्यवस्थापनसम्बन्धी कार्यलाई छिटो, प्रभावकारी र व्यवस्थित बनाउन राष्ट्रिय किताबखानाले विशेष तालिमप्राप्त जनशक्तिसहितको ‘विशेष कार्यदल’ गठन गरी द्रुत सेवा सञ्चालन गरिरहेको जानकारी दिए।
मन्त्री महावीर पुनको नेतृत्वमा रहेको विज्ञान, प्रविधि तथा नवप्रवर्तन मन्त्रालयको स्वीकृत संगठन संरचनाअनुसार मन्त्रालयमा विशिष्ट श्रेणीको एक सचिव रहने व्यवस्था गरिएको छ। त्यसैगरी दुई जना इन्जिनियरिङ सेवाका सहसचिव र एक जना प्रशासन सेवाका सहसचिवसहित तीन जना सहसचिव रहने गरी कुल ९० वटा दरबन्दी कायम गरिएको छ।