१
केही कुरा सोध्नु थियो, रिसाउँछौ कि कतै
फूलमा काँडा अनायसै, मिसाउँछौ कि कतै
आफ्नै मनले धेरै थरी, कुराहरू खेलाउँदै
त्यो बोझिलो तन-मन फेरि, बिसाउँछौ कि कतै।
२
भिडमा पनि हिजो एक्लै देखेँ तिमीलाई
दुई नयनका आँसुले छेकेँ तिमीलाई
हिजो भन्दा आज तिमी बदलिएको पाएँ
तर पनि अन्तिम चिठी लेखेँ तिमीलाई।
३
रिसाउँदा फकाउने बात तिनै हुन्
मन जल्दा मलम दिने साथ तिनै हुन्
त्यसैले त तिम्रै याद आउँछ कति कति
रुँदा आँसु पुछिदिने हात तिनै हुन्

बिज्ञापन