राजधानी काठमाडौं प्रवेश गर्ने प्रमुख बीपी राजमार्ग रोशी खोलामा आएको बाढीका कारण पूर्ण रूपमा अवरुद्ध भएपछि वैकल्पिक मार्ग सञ्चालनमा ल्याइएको छ ।
बिज्ञापन
सडक डिभिजन चरिकोटका डिभिजन प्रमुख ई. नारायणदत्त भण्डारीका अनुसार बीपी राजमार्गको खुर्कोट–मन्थली–चरिकोट–दोललघाट हुँदै काठमाडौं आउने वैकल्पिक मार्ग आजदेखि सञ्चालनमा आएको हो ।
बिज्ञापन
उनका अनुसार अविरल वर्षाका कारण विभिन्न ठाउँमा खसेका पहिरो हटाइएपछि सवारीसाधन सञ्चालनमा ल्याइएको हो । दोलखाको कालदह क्षेत्रमा सडक मर्मत कार्य सकिएसँगै यातायात आवागमन सहज भएको डिभिजन प्रमुख भण्डारीले जानकारी दिनुभयो ।
उहाँले भन्नुभयो, “खुर्कोट–मन्थली–चरिकोट हुँदै काठमाडौं आउने सडक अहिले राम्रो अवस्थामा छ । केही स्थानमा साना अवरोधहरू हटाइएका छन् । पूर्वी पहाड र मधेस प्रदेशबाट आउने सवारीसाधनले ढुक्क भएर यस मार्गको प्रयोग गर्न सक्नुहुन्छ ।”
बिज्ञापन
भण्डारीका अनुसार हाल कालदह क्षेत्रमा सडक एकतर्फी सञ्चालनमा भए पनि भोलिदेखि दुईतर्फी आवागमन सुरु गर्ने तयारी भइरहेको छ ।
यससँगै बाढीका कारण अवरुद्ध बनेको तातोपानी नाका पनि केही दिनभित्र सञ्चालनमा ल्याउने उद्देश्यले भोलिबाट पुनर्निर्माण कार्य सुरु हुने जानकारी भण्डारीले दिनुभयो ।
खुर्कोट–मन्थली–दोलखा–खाँडीचोर–दोललघाट–धुलिखेल हुँदै काठमाडौं पुग्ने यो वैकल्पिक मार्ग केही लामो भए पनि अहिलेका लागि सबैभन्दा सुरक्षित विकल्प रहेको बताइन्छ ।
