अख्तियार दुरुपयोग अनुसन्धान आयोगले पाँच जनाविरुद्ध भ्रष्टाचार मुद्धा दायर गरेको छ । आयोगले विद्यालय निर्माणमा भ्रष्टाचार भएको ठहर गर्दै विद्यालयका प्रधानाध्यापक,विद्यालय व्यवस्थापन समितिको अध्यक्ष, पालिकाको निमित्त प्रमुख प्रशासकीय अधिकृत र सव–इन्जिनियरलाई प्रतिवादी बनाएर विशेषमा मुद्धा दायर गरेको हो ।
बिज्ञापन
आयोगले बझाङको वित्थडचिर गाउँपालिका–९ स्थित श्री सुनकुडा माध्यमिक विद्यालयको भवन निर्माणमा अनियमितता गरेको आरोपमा तत्कालीन अवस्थाका प्रधानाध्यापकसहित विद्यालय व्यवस्थापन समितिका अध्यक्ष,तत्कालीन निमित्त प्रमुख प्रशासकीय अधिकृतसहित सव इन्जिनियरलाई प्रतिवादी बनाएर विशेषमा मुद्धा दायर गरेको हो ।
सो विद्यालयको ३ तले १२ कोठे नमुना भवन निर्माण गर्दा वास्तविक कामभन्दा बढी मूल्याङ्कन गरी सरकारी रकम हिनामिना गरेको भन्दै आयोगले विद्यालयका प्रधानाध्यापकसहित विद्यालय व्यवस्थापन समितिका तत्कालीन अध्यक्ष रमेश बहादुर अधिकारी, प्रधानाध्यापक धन बहादुर विष्ट र लेखापाल हर्क बहादुर विष्टविरुद्ध २६ लाख ५४ हजार ६८३ रुपैयाँ बिगो कायम गरिएको छ । त्यस्तै, गाउँपालिकाका तत्कालीन निमित्त प्रमुख प्रशासकीय अधिकृत रमेश बहादुर विष्ट र सव–इन्जिनियर किरण भण्डारीविरुद्ध २० लाख १ हजार ७७९ रुपैयाँ बिगो दाबी गर्दै कैद र जरिवानाको माग गरिएको अख्तियारले जनाएको छ ।
