बिज्ञापन

बिज्ञापन

सिंहदरबारस्थित आयोग कार्यालयमा मङ्सिर १७ र १८ गते बोलाइएका सहसचिव रिजालसँग दुई चरणमा सोधपुछ सम्पन्न भएको आयोगका सदस्यहरूले पुष्टि गरेका छन् । आयोगका एक सदस्यका अनुसार केही प्रश्नहरू अझै बाँकी रहेको हुँदा शुक्रबार पुनः पुग्न उनलाई भनिएको छ ।

भदौ २३ र २४ गते बानेश्वर क्षेत्रमा किशोरको ज्यान जानेगरी गोली चलेपछि आदेशको जिम्मेवारी छवि रिजालमाथि लागेको थियो । सामाजिक सञ्जालमा चर्को आलोचना भएपछि जिल्ला प्रशासन कार्यालयको वेबसाइटबाट उनका तस्बिर समेत हटाइएको थियो ।

गौरीबहादुर कार्की नेतृत्वको आयोग अहिले विभिन्न सुरक्षा निकायका उच्च अधिकारीदेखि प्रशासकहरूसम्म व्यापक छानबिन गर्दै आएको छ ।

यसअघि आयोगले— तत्कालीन सशस्त्र प्रहरी कार्य विभाग प्रमुख नारायणदत्त पौडेल, नेपाल प्रहरीका पूर्व कार्य विभाग प्रमुख तथा हाल प्रहरी प्रशिक्षण प्रतिष्ठानमा कार्यरत एआईजी सिद्धि विक्रम शाह, राष्ट्रिय अनुसन्धान विभागका पूर्व प्रमुख हुतराज थापा, पूर्वमुख्यसचिव एकनारायण अर्याल, डीआईजी कृष्ण खनाल, ओम राना, सुरेश श्रेष्ठ, एसपी अपिल बोहरा र कुलदिप चन्दलगायतसँग सोधपुछ गरिसकेको छ ।

आयोगका एक सदस्यका अनुसार, अहिलेसम्म करिब १५० जनासँग बयान तथा सोधपुछ प्रक्रिया सम्पन्न भइसकेको छ । उनका शब्दमा, “जेन–जी घटनासँग जोडिएका सबै तह र पक्षलाई समेटेर हामी निष्कर्षमा जाँदै छौँ ।”

आयोगको निष्कर्ष जेन–जी प्रदर्शनबारे राज्यका निर्णय, निर्देशन र घटनाक्रमलाई औपचारिक रूपमा उजागर गर्ने प्रमुख आधार मानिएको छ ।