बिज्ञापन

बिज्ञापन

मन्त्रालयले स्वास्थ्य व्यवस्थापन महाशाखाका निर्देशक पवनजंग रायमाझीलाई पदमुक्त गरी अन्यत्र सार्ने निर्णय गरेको छ। रायमाझी माथि सेटिङ मिलाएर काम गर्ने, ठेक्कापट्टा र खरिद प्रक्रियामा व्यवसायीहरूसँग मिलेमतो गरेको, साथै भेरी अस्पताल, नेपालगञ्जमा औषधि र फर्निचर खरिदमा अनियमितता गरेको आरोप लागेको छ।

फार्मेसी शाखाका प्रमुख पदम अर्याल, फार्मेसी सुपरभाइजर अभिनाष गुप्ता र दिनेश नेपालीसहितको समूहले “सेटिङ मिलाएर अस्पतालको करोडौं रकम हिनामिना गरेको” दाबी गर्दै अख्तियारमा उजुरी समेत दायर भएको थियो। स्रोतका अनुसार, रायमाझीले ती कर्मचारीहरूलाई संरक्षण दिएको आरोप पनि लागेको छ।

मन्त्रालयले नयाँ व्यवस्थापनअनुसार परिवार कल्याण महाशाखाको नेतृत्व डा. मदनकुमार उपाध्यायलाई, व्यवस्थापन महाशाखाको जिम्मेवारी केशवराज पण्डितलाई, उपचारात्मक महाशाखाको नेतृत्व डा. पवनजंग रायमाझीलाई र राष्ट्रिय स्वास्थ्य शिक्षा, सूचना तथा सञ्चार केन्द्रको निर्देशकमा डा. राधिका थपलियालाई तोकेको छ।

विगतमा व्यवस्थापन महाशाखा “खरिदबिक्री हुने पद” भनेर विवादमा पर्ने गरेको भए पनि यसपटक सो पदमा इमानदार छवि भएका पण्डितलाई पठाइएपछि मन्त्रालयभित्र चासो बढेको छ।

अख्तियारले कार्तिक २ गते स्वास्थ्य सेवा विभागका तत्कालीन महानिर्देशक डा. श्रवणकुमार थापासहित १४ जनामाथि भ्रष्टाचार मुद्दा दायर गरेको पृष्ठभूमिमा यो फेरबदल गरिएको हो।

अख्तियारले स्वास्थ्य क्षेत्रमा निगरानी कडा पार्दै अनुसन्धान तीव्र बनाएको बेला पण्डितलाई त्यस महाशाखामा पठाइनु “साहसी निर्णय” का रूपमा हेरिएको छ।

स्रोतहरूका अनुसार, स्वास्थ्य मन्त्रालयले आगामी दिनमा अरू केही महाशाखा र मातहतका निकायमा पनि ‘क्लिन–अप नीति’ अपनाउने तयारी गरेको छ।

स्वास्थ्य क्षेत्रमा फैलिँदै गएको “सेटिङ संस्कृति” अन्त्य गर्न मन्त्रालय नेतृत्वले दृढता देखाउने कि पुनः पुरानै शैली दोहोरिने भन्ने प्रश्न अहिले मन्त्रालयभित्र चर्चाको मुख्य विषय बनेको छ।