आफ्नै कार्यस्थलमा कार्यरत एक कर्मचारीले कार्यालयमै आगजनी गरेपछि झिमरुक गाउँपालिका तनावग्रस्त बनेको छ।
बिज्ञापन
गाउँपालिकामा रोजगार संयोजकका रूपमा करारमा कार्यरत सुदर्शक जिसीले शुक्रबार राति गाउँपालिका अध्यक्ष पित बहादुर महतरा क्षेत्रीको कार्यकक्षमा आगो लगाएका हुन्। साथै उपाध्यक्ष प्रमोद पोखरेलको कार्यकक्षमा समेत तोडफोड गरिएको प्रहरीले जनाएको छ।
बिज्ञापन
गाउँपालिका भवन नजिकै कोठा भाडामा लिएर बस्दै आएका जिसीलाई प्रहरीले नियन्त्रणमा लिएको छ। जिल्ला प्रहरी कार्यालय प्युठानका प्रमुख प्रहरी नायब उपरीक्षक (डीएसपी) दिपेश बस्यालका अनुसार घटनाको अनुसन्धान सुरु गरिएको छ।
“गाउँपालिकाले आधिकारिक रूपमा किटानी जाहेरी दिने तयारी गरेको छ,” बस्यालले भने, “निर्णय अनुसार कानुन बमोजिम कारबाही अघि बढाइनेछ।”
अचानक भएको आगजनीले कर्मचारीहरू त्रसित बनेको प्रमुख प्रशासकीय अधिकृत शाकुन्तला अर्यालले बताइन्। उनका अनुसार कार्यालयको वातावरण नै असुरक्षित बनेपछि कर्मचारीहरूमा आक्रोश र भय दुवै देखिएको छ।
बिज्ञापन
गाउँपालिका कार्यपालिकाको बैठक आइतबार बिहान ७:३० बजे बस्दैछ। बैठकले आगो लगाउने कर्मचारीमाथिको कारबाहीबारे निर्णय गर्ने अपेक्षा गरिएको प्रहरीले जनाएको छ। कार्यालयकै कर्मचारीबाट आगजनी हुने यस्तो घटना दुर्लभ मानिँदै छ, जसले स्थानीय प्रशासन र गाउँपालिकालाई थप चुनौतीपूर्ण स्थिति सृजना गरिदिएको छ।
