कर्मचारीहरुले क्युआर कोडबाटै घुस खाने गरेको म्यानपावर व्यवसायीहरुले बताएका छन् । यसरी खुलेआम घुसको कारोवार हुने गरेको कार्यालय हो ताहाचलस्थित वैदेशिक रोजगार कार्यालय ।
बिज्ञापन
मालपोत हुँदै अर्काे मालदार मानिएको बैरो कार्यालयमा केही महिना अगाडि पुगेका एक नायब सुव्वा यो मामलामा सबैभन्दा अगाडि रहेको म्यानपावर व्यवसायीहरुको भनाई रहेको छ ।
बिज्ञापन
कर्मचारीमाझ चर्चित विचौलियाका रुपमा चित्रित्र उदयपुरका प्रमोद खड्काका निकटका कर्मचारी हुन,प्रमोद अधिकारी । उनी पनि सोही जिल्लावासी । विचौलियाको साथ भएकै कारण रोज्जा र खोजेकै कार्यालयमा बस्ने अवसर पाइरहेका उनको कर्मचारी संकेत नम्बर २०३१४३ रहेका उनी यस अघि भक्तपुर मालपोतको मुद्धा शाखा ‘ख’ मा कार्यरत थिए । त्यहाँ दुई बर्ष बसेर अहिले ताहाचलस्थित वैदेशिक रोजगार कार्यालयमा पुगेका छन् ।
उनी सरुवा मिलाएर मालपोतबाट वैदेशिक रोजगार कार्यालयमा गएपछि आफ्ना दाई खिलराज अधिकारीलाई भक्तपुर मालपोतमै लैजाने चाजोपाँचो मिलाएका छन् । उनका दाजु अहिले मालपोतको रजिस्ट्रेशन शाखामा कार्यरत रहेका छन् ।
बिज्ञापन
भक्तपुर मालपोतका कर्मचारीहरुका अनुसार,मालपोतमा कार्यरत रहँदा विचौलिया प्रमोदको इशारामा काम गर्दै आएका थिए । वैदेशिक रोजगार कार्यालयमा व्यक्तिगत श्रम स्वीकृति शाखामा कार्यरत छन् । अहिले आठ सय भन्दा बढी म्यानपावर कम्पनी रहेका छन् । म्यानपावर व्यवसायीहरुका अनुसार उनीहरुलाई सबैभन्दा बढी दुख दिनेमा उनै सुव्वा अधिकारीको नाम अग्रपक्तिंमा आउँछ ।
पछिल्लो समय उक्त कार्यालय नै घुसघोरीको अड्डा बनेको र दैनिक ७० लाखसम्म घुस असुल हुने गरेको बिषय संसदसम्म पुगेपछि तत्कालीन महानिर्देशक सूर्य खत्रीलाई मन्त्रालयमा तानेर त्यहाँ जीवलाल भुसाललाई पठाइएको थियो । भुसाल जान नमानेपछि अहिले कमल भट्टराई त्यहाँका डिजी छन् ।तत्कालीन डिजीको सेटै परिवर्तन हुँदा समेत अधिकारीलाई भने चलाइएन ।
अधिकारीले विगतको कमाउ धन्दा जारी राखेका छन् । व्यवसायीहका अनुसार,पैसा नपाएमा सबै प्रक्रिया पूरा गरेका कामदारको समेत श्रम स्वीकृति रोक्ने गरेको र रकम पाएमा कागजात पूरा नभएका कामदारको पनि श्रम स्वीकृति दिने गुनासो गर्दछन् ।
श्रम स्वीकृति लिनका लागि अनलाइनमार्फत नै काम हुने भनिए पनि श्रम स्वीकृति पैसा नपाइ नदिने गर्ने गरेको गुनासो व्यवसायीहरुले गर्ने गरेका छन् । विभिन्न एजेन्टमार्फत नगद वा अनधिकृत व्यक्तिको क्यु आर कोडमा अग्रिम अर्थात् प्रिपेड रकम भुक्तानी भएपछि मात्रै श्रम स्वीकृति दिने गरिएको बताइएको छ । विशेष गरि जापान, कतार, मलेसिया, साउदी अरेबिया, अल्बानिया, मौरिसस, चिली, पुलाउ, अजरवैजान, क्यामन जस्ता मुलुकहरुमा ठूलो मात्रामा रकम उठाउने गरिएको व्यवसायीहरु बताउँछन् ।
यो बिषयमा अधिकारीसँग जिज्ञासा राख्दा आफू गृह अन्तरगतको कार्यलयमा कार्यरत रहँदा प्रमोद खड्कासँग सम्बन्ध र चिनजान भएको स्वीकार गरेका छन् ।
