तोकिएको समयभित्र प्रतिनिधि सभाका ६ सदस्यले सम्पत्ति विवरण नबुझाएको जनाइएको छ । संघीय संसद् सचिवालयले जेठ १० गते आइतबारसम्म सांसदहरूलाई सम्पति विवरण बुझाउन समय दिएको थियो तर तोकिएको समयसीमाभित्र रास्वपाका पाँच र नेकपाका एक गरी ६ जना सांसदले सम्पत्ति विवरण नबुझाएका हुन् ।
संघीय संसद सचिवालयका अनुसार,रास्वपाका सांसदहरु आशा झा, कोमल ज्ञवाली, तपेश्वर यादव, प्रमोद कुमार महतो र रबिन महतो र नेकपाका संसद् धनबहादुर बुढाले तोकिएको समयसीमाभित्र सम्पत्ति विवरण नुबझाएका हुन । संसद सचिवालयका अनुसार,२७५ सदस्यीय प्रतिनिधि सभामा १७ मन्त्री छन् । मन्त्रीले प्रधानमन्त्री तथा मन्त्रिपरिषद्को कार्यालयमै सम्पति विवरण बुझाउने प्रचलन छ । यस्तै २६० मध्ये २५४ जना सांसदले सम्पति विवरण बुझाएको र ६ जनाले नबुझाएको संघीय संसद सचिवालयले जनाएको छ ।
बिज्ञापन
भ्रष्टाचार निवारण ऐनको दफा ५० को उपदफा (१) र अख्तियार दुरुपयोग अनुसन्धान आयोग ऐन को दफा ३१ क को उपदफा (१) मा रहेको सार्वजनिक पद धारण गरेको व्यक्तिले सार्वजनिक पद धारण गरेको मितिले ६० दिनभित्र आफ्नो र आफ्नो परिवारको नाममा रहेको सम्पत्तिको स्रोत वा निस्सा सहितको अद्यावधिक सम्पत्ति विवरण तोकिएको निकाय वा अधिकारी समक्ष पेश गर्नुपर्ने व्यवस्था छ । त्यही अनुसार सचिवालयले सूचनामार्फत फागुन २१ गते सम्पन्न निर्वाचनबाट निर्वाचित सांसदहरूलाई जेठ १० गतेसम्म सम्पत्ति विवरण बुझाउन आग्रह गरेकोमा तोकिएको समयसीमाभित्र ६ जनाले सम्पत्ति विवरण नबुझाएका हुन ।
बिज्ञापन
