नवनिर्वाचित सांसद अमरेश सिंहले नेपाली कांग्रेसका सभापति तथा चुनावी प्रतिस्पर्धी गगन थापालाई चुनाव सकिएकाले विगतका तीता अनुभव बिर्सेर देश निर्माणको दिशामा अघि बढ्न आग्रह गरेका छन्।
बिज्ञापन
सिंहले सामाजिक सञ्जालमार्फत थापालाई सम्बोधन गर्दै खुल्लापत्र लेखेका हुन्। उनले सर्लाहीमा आएर चुनाव लडेकोमा थापालाई धन्यवाद दिँदै चुनावले प्रतिस्पर्धा रोचक बनेको बताएका छन्।
बिज्ञापन
उनले आफ्नो पत्रमा केही भ्रष्ट समूहको प्रभावमा चुनावी प्रतिस्पर्धा भएको दाबी गर्दै ती समूहले आफूविरुद्ध व्यक्तिगत तथा पारिवारिक जीवनमाथि टिप्पणी गराएको आरोप समेत लगाएका छन्। यद्यपि, यस्तो गतिविधिले आफूलाई खासै असर नगरेको उल्लेख गर्दै सिंहले राजनीति सिद्धान्त र एजेन्डामा आधारित हुनुपर्ने धारणा व्यक्त गरेका छन्।
सिंहले चुनावी प्रतिस्पर्धामा भएका तीता कुरा अब बिर्सनुपर्ने बताउँदै आगामी दिनमा देश निर्माणका विभिन्न मुद्दामा सहकार्य हुन सक्ने पनि संकेत गरेका छन्।
बिज्ञापन
उनले आफू आबद्ध रहेको राष्ट्रिय स्वतन्त्र पार्टीले भ्रष्टाचारविरुद्ध जनमत पाएको दाबी गर्दै थापालाई पनि भ्रष्टाचारविरुद्धको स्वच्छ राजनीतिमा साथ दिन आग्रह गरेका छन्।
सिंहले पत्रको अन्त्यमा थापाले कांग्रेसभित्र परिवर्तन ल्याउने प्रयास गरेको उल्लेख गर्दै आगामी राजनीतिक यात्रा अझ स्वच्छ र पारदर्शी होस् भन्ने शुभकामना व्यक्त गरेका छन्।
