मुस्ताङ । कोरला नाकाबाट लामो समयदेखि हुने चोरी निकासी र पैठारी हाल पूर्ण रूपमा नियन्त्रणमा आएको सुरक्षा तथा भन्सार निकायले स्पष्ट पारेका छन्। निरन्तर निगरानी, कडा चेकजाँच र संयुक्त सुरक्षा अपरेसनका कारण अवैध कारोबारमा संलग्न समूहहरू तितरबितर भएका छन् भने विशेषगरी विद्युतीय चुरोट (भेप) तस्करीमा संलग्न गिरोहहरू भागाभाग अवस्थामा पुगेका छन्।
बिज्ञापन
नेपाल प्रहरी, सशस्त्र प्रहरी बल नेपाल र मुस्ताङ भन्सार कार्यालयको समन्वयमा पछिल्लो समय कोरला नाकामा सुरक्षा व्यवस्था उल्लेख्य रूपमा कडा बनाइएको छ। नियमित गस्ती, आकस्मिक सवारी जाँच, कन्टेनर तथा ढुवानी साधनको सूक्ष्म तलासी र विशेष सूचनाको प्रभावकारी प्रयोगका कारण तस्करीका प्रयासहरू क्रमशः असफल हुँदै गएका छन्।
बिज्ञापन
यसैक्रममा हालै दुई करोड २४ लाख रुपैयाँ बराबरका १६ हजार थान भेप बरामद हुनु तस्करी नियन्त्रणमा भएको ठोस उपलब्धिका रूपमा लिइएको छ। सो घटनापछि कोरला नाकाबाट भेपसहित अन्य अवैध वस्तु ओसारपसार गर्ने गिरोहहरूमा ठूलो त्रास फैलिएको सुरक्षा निकायको दाबी छ। नाकामा कडाइ बढेपछि तस्करीमा संलग्न व्यक्तिहरू मार्ग परिवर्तन गर्न वा कारोबार नै छाड्न बाध्य भएको बताइएको छ।
भन्सार कार्यालयका अनुसार पछिल्लो समय कोरला नाकाबाट हुने आयात–निर्यात प्रक्रिया पनि पारदर्शी र व्यवस्थित बन्दै गएको छ। मिति २०८२/१०/०७ सम्म कोरला नाकाबाट ५ अर्ब ५२ करोड ९७ लाख रुपैयाँ राजस्व संकलन भएको छ। यस अवधिमा ११ अर्ब ६८ करोड ४४ लाख रुपैयाँ बराबरका वस्तु आयात भएका छन् भने २० करोड ३० लाख ३९ हजार रुपैयाँ मूल्यका वस्तु निर्यात भएका छन्। भन्सार अधिकारीहरूका अनुसार राजस्व संकलनमा भएको यो वृद्धि पनि चोरी निकासी–पैठारी नियन्त्रणको प्रत्यक्ष परिणाम हो।
बिज्ञापन
सुरक्षा तथा भन्सार संयन्त्रले कोरला नाकालाई अब ‘उच्च जोखिम क्षेत्र’का रूपमा वर्गीकरण गर्दै चौबीसै घण्टा निगरानीमा राखिएको जनाएको छ। सीमा क्षेत्रमा सशस्त्र प्रहरी बलको उपस्थिति थप सुदृढ बनाइएको छ भने नेपाल प्रहरी र भन्सार कर्मचारीबीच सूचना आदान–प्रदानलाई अझ प्रभावकारी बनाइएको छ।
सुरक्षा निकायले अवैध कारोबारमा शून्य सहनशीलताको नीति अपनाइएको स्पष्ट पार्दै आगामी दिनमा पनि चोरी निकासी–पैठारी, तस्करी तथा राजस्व छलिविरुद्ध कडा कारबाही निरन्तर जारी रहने जनाएको छ। कोरला नाकामा राज्यको प्रभावकारी उपस्थिति कायम भएसँगै तस्करी नियन्त्रण दीगो रूपमा कायम रहने विश्वास व्यक्त गरिएको छ।
