काठमाडौँ–ललितपुरको बजारमा उपभोक्ता अधिकारको अवस्था जाँच्न वाणिज्य, आपूर्ति तथा उपभोक्ता संरक्षण विभागले कडाइ बढाएको छ। पछिल्लो अनुगमन क्रममा विभागको टोलीले राजधानीका विभिन्न १८ व्यवसायिक फर्मको निरीक्षण गर्दा नियमविपरीत गतिविधि भेटिएको छ।
बिज्ञापन
उपभोक्ता संरक्षण ऐन, २०७५ उल्लंघन गरेको ठहर गर्दै विभागले न्यू आर ए इन्टरप्राइजेज लाई २० हजार रुपैयाँ जरिवाना गरेको छ। पेन्ट्स कम्पनी, हार्डवेयर पसल तथा निर्माण सामग्री बिक्री केन्द्रित गरी गरिएको अनुगमनमा अन्य १७ फर्ममा पनि कैफियत देखिएपछि तत्काल सुधार गर्न निर्देशन दिइएको विभागले जनाएको छ।
विभागका अनुसार बजार अनुशासन कायम गर्ने उद्देश्यले यस्ता अनुगमनलाई नियमित बनाइएको छ। कालाबजारी नियन्त्रण, उपभोक्ता ठगी रोकथाम, वातावरण संरक्षण तथा व्यवसायिक सुधारका लागि आवश्यक कारबाहीलाई निरन्तरता दिइने बताइएको छ। उपभोक्ताको हित र बजारको पारदर्शिता सुनिश्चित गर्न आगामी दिनमा अझ सशक्त अनुगमन हुने विभागको भनाइ छ।
