कपिलवस्तु । राष्ट्रिय स्वतन्त्र पार्टी (रास्वपा) कपिलवस्तु जिल्ला समितिले संगठन विभागको जिम्मेवारी पाएका रिखिराम भट्टराईलाई २४ घण्टे लिखित स्पष्टीकरण सोधेको छ।
बिज्ञापन
जिल्ला सभापति शिवकुमार सुवेदीले भट्टराईले मदिरा सेवनको अवस्थामा फोनमार्फत आफूलाई जथाभावी गालीगलौज गरेको आरोप लगाउँदै कारबाही प्रक्रिया अघि बढाइएको जानकारी दिएका छन्। सुवेदीका अनुसार फोनवार्ताको सुरुमै भट्टराईले अपमानजनक शब्द प्रयोग गर्दै हकारेका थिए।
बिज्ञापन
सभापति सुवेदीले भट्टराईलाई सामाजिक सञ्जालमा फलोअर्स धेरै भएकै आधारमा संगठन विभागको जिम्मेवारी दिइएको दाबी गर्दै पछिल्लो समय उनका गतिविधि पार्टी संगठनको हितविपरीत रहेको बताए। पार्टी नेतृत्व—जिल्ला सभापति, उपसभापति तथा नगर सभापतिहरू—प्रति मानमर्दन हुने गरी गालीगलौज गरिएको र यसले पार्टीप्रति आस्था राख्ने कार्यकर्तालाई निराश बनाएको आरोप पत्रमा उल्लेख छ।
जिल्ला समितिले जारी गरेको पत्रमा संगठन विस्तारको जिम्मेवारी पाएको व्यक्तिले अनुशासनहीन गतिविधिमा संलग्न भई पार्टीको मर्यादा र संगठनात्मक एकतालाई क्षति पुर्याएको भन्दै किन कारबाही नगर्ने भन्ने विषयमा २४ घण्टाभित्र लिखित जवाफ दिन मौका प्रदान गरिएको जनाइएको छ।
बिज्ञापन
यस विषयमा रिखिराम भट्टराईको प्रतिक्रिया भने आउन बाँकी रहेको छ।
