बिज्ञापन

बिज्ञापन

थापाले न त कार्यालयमा हाजिर रहे, न त कार्यवाहकलाई सूचना दिए। ‘उहाँ १४ गतेदेखि कार्यालय आउनुभएको छैन,’ कार्यवाहक नगर प्रमुख रेखा यादवको भनाइ छ, ‘जाँदा कम्तीमा जानकारी दिनुपर्थ्यो, तर उहाँले एक शब्द पनि भन्नुभएन।’

स्थानीय सरकार सञ्चालन ऐनअनुसार कार्यालय प्रमुख अनुपस्थित हुँदा निमित्त तोक्नुपर्छ। तर थापाले छाडेर जाँदा यो कानुनी प्रक्रिया पनि पालना भएन। परिणामस्वरूप दैनिक काम लिएर आउने नागरिक ‘दैलोमै फर्किने’ अवस्थामा पुगेका छन्।स्थानीय किशोरी यादव भन्छिन्, ‘उहाँ विरलै कार्यालयमा देखिनुहुन्छ। अहिले त पूरा नगर नै प्रमुखविहीन जस्तो छ।’

स्थिति गम्भीर भएपछि नगरपालिकाले जिल्ला प्रशासन कार्यालय सिरहा र संघीय मामिला तथा सामान्य प्रशासन मन्त्रालयलाई लिखित जानकारी पठाएको छ। तर कार्यालय प्रमुखको अवस्थाबारे अझै कुनै जवाफ आएको छैन।

जिल्ला प्रशासन कार्यालयका सहायक प्रमुख जिल्ला अधिकारी चेतराज बरालको भनाइमा, ‘उहाँ हाम्रो सम्पर्कमा पनि हुनुहुन्न। कामकाज प्रभावित हुन नदिन विकल्प खोज्दैछौं।’थापाको अनुपस्थितिले कल्याणपुरमा प्रशासनिक शून्यता सिर्जना भएको छ भने सेवाग्राही दिनदिनै निराश भएर फर्किन बाध्य भएका छन्।