अख्तियार दुरुपयोग अनुसन्धान आयोगले आन्तरिक राजस्व कार्यालय धरानका तत्कालीन कर अधिकृत तिलक आलेसहित २ जनाविरुद्ध भ्रष्टाचार मुद्दा दायर गरेको छ ।
बिज्ञापन
आयोगले कर अधिकृत आले र स्वामिनारायण निर्माण सेवा प्रालि धरानका प्रबन्ध निर्देशक सन्तोषकुमार बस्नेतविरुद्ध बिहीबार विशेष अदालतमा भ्रष्टाचार मुद्दा दायर गरेको हो ।उनीहरूविरुद्ध १ करोड २३ लाख ६९ हजार ६४९ रूपैयाँ बिगो कायम गरिएको छ ।
बिज्ञापन
मोरङको सुन्दरहरैंचा नगरपालिकाकाले गछिया खोलामा बालुवा गिट्टी उत्खनन गर्न स्वामिनारायण निर्माण सेवा प्रालिलाई भ्याटबाहेक ९ करोड ५१ लाख ५१ हजार १५१ रुपैयाँमा २८ जेठ २०७७ सालमा ठेक्का दिएको थियो । आर्थिक बर्ष ०७६ ०७७ मा दिइएको ठेक्कामा सम्झौता भए अनुरुप निर्माण सेवाले आन्तरिक राजश्व कार्यालयमा दाखिला गर्नुपर्ने भ्याट रकम दाखिला नगरी मिलेमतोमा भ्रष्टाचार गरेको अभियोग भन्दै अख्तियारले उनीहरु विरुद्ध मुद्धा विशेषमा लगेको हो ।
अख्तियारका अनुसार निर्माण कम्पनीले भ्याट रकम बापतको १ करोड २३ लाख६९ हजार ६४९ रुपैयाँ रकम आन्तरिक राजस्व कार्यालयमा दाखिला गर्नुपर्नेमा त्यसो नगरी फर्जी कागजात बनाएर राजस्व चुहावट गरेको जनाएको छ ।
कर अधिकृत आले र बस्नेतले आपसी मिलेमतोमा आन्तरिक राजस्व कार्यालय धरानबाट ३० चैत २०७७ सालमा भ्याट दाखिला गरेको भनी नगरपालिकालाई झुट्टा लिखत बनाई पत्राचार गरी राजस्व छली गरेको अख्तियारको आरोपपत्रमा उल्लेख छ । अख्तियारले उनीहरूविरुद्ध जनही १ करोड २३ लाख ६९ हजार ६४९ रुपैयाँ बराबरको बिगो माग दाबी गरेको छ ।
