बिज्ञापन

बिज्ञापन

“जोखिममा परेका र बाटो पत्ता लगाउन नसकेर अलपत्र पर्यटकहरूलाई डोरीको सहायताले बाटो पहिल्याउँदै उद्धार गरिएको हो,” निरीक्षक पौडेलले भने। उनका अनुसार उद्धार गरिएका सबैलाई अन्नपूर्ण गाउँपालिका–४ को गुफाफाँट र सादिखर्क लगायत हिमपात नभएका सुरक्षित स्थानहरूमा ल्याइएको छ। उद्धार गरिएकामध्ये केहीमा श्वासप्रश्वासका समस्या देखिए पनि गम्भीर अवस्था भने छैन।

प्रमुख जिल्ला अधिकारी बद्रीप्रसाद तिवारीले हिमपातजन्य जोखिम बढेपछि कार्तिक १० देखि १४ गतेसम्म अन्नपूर्ण बेसक्याम्प प्रवेशमा रोक लगाइएको जानकारी दिए। उनले भने, “हिमपात र हिउँ पहिरोको जोखिम बढेकाले त्यहाँ कुनै पनि स्वदेशी वा विदेशी पर्यटकलाई प्रवेश अनुमति दिइएको छैन।”

तिवारीका अनुसार उच्च पहाडी तथा हिमाली भेगमा बसोबास गर्ने स्थानीय बासिन्दा, पर्यटक, पर्यटन व्यवसायी र पदयात्री सबैलाई मौसमी अवस्थाको जानकारी लिएर मात्र यात्रा गर्न आग्रह गरिएको छ।

हाल अन्नपूर्ण बेसक्याम्प पूर्ण रूपमा खाली गरिएको छ र उद्धार गरिएका सबै व्यक्तिहरू सुरक्षित स्थानमा रहेका छन्। हिमपात र हिउँ पहिरोका कारण बाटो अवरुद्ध भएकाले उद्धार टोलीले डोरी र सुरक्षात्मक उपकरण प्रयोग गरी कठिन परिस्थितिमा उद्धार कार्य सम्पन्न गरेको हो।

जल तथा मौसम विज्ञान विभागले अझै केही दिनसम्म पश्चिमी भेगका उच्च पहाडी क्षेत्रमा वर्षा र हिमपातको सम्भावना रहेको बताएको छ। जिल्ला प्रशासन कार्यालयले मौसम सुधार नभएसम्म बेसक्याम्पतर्फको आवतजावत नगर्न सबैलाई अनुरोध गरेको छ।