लगातारको वर्षाका कारण अवरुद्ध रहेको तातोपानी नाका अब पुनः सञ्चालनमा आएको छ । सडक डिभिजन चरिकोटका प्रमुख इन्जिनियर नारायणदत्त भण्डारीका अनुसार सडक मर्मत र पहिरो पन्छाउने काम पूरा भएपछि आजदेखि सवारी आवागमन नियमित रूपमा सञ्चालनमा आएको हो ।
बिज्ञापन
गत असोज १८ गतेको अविरल वर्षाले तातोपानी जाने मुख्य सडकखण्डका विभिन्न स्थानमा पहिरो गएपछि नाका अवरुद्ध भएको थियो । सडक अवरुद्ध हुँदा सीमावर्ती व्यापार, यातायात सेवा र स्थानीय आवागमन प्रभावित भएको थियो ।
बिज्ञापन
इन्जिनियर भण्डारीका अनुसार डिभिजनको प्राविधिक टोली, स्थानीय निकाय र सडक निर्माण कम्पनीको समन्वयमा सडक सफाइ र मर्मत कार्य तीव्र रूपमा अगाडि बढाइएकाले छोटो समयमै सडक सञ्चालनमा ल्याउन सम्भव भएको हो ।
हाल सडक सुचारु भए पनि अझै केही जोखिमयुक्त स्थानमा सावधानी अपनाउन चालक र यात्रुहरूलाई आग्रह गरिएको छ । उनले भने, “तातोपानी सडकखण्डमा आवतजावत खुल्ला भए पनि भूस्खलनको जोखिम कायम छ, त्यसैले आवश्यक सतर्कता अपनाएर मात्र यात्रा गर्न अनुरोध गर्दछौं।”
बिज्ञापन
तातोपानी नाका सञ्चालनमा आएसँगै सीमापार व्यापार र पर्यटन गतिविधि पनि क्रमशः पुनःसञ्चालित हुने अपेक्षा गरिएको छ।
