राप्ती स्वास्थ्य विज्ञान प्रतिष्ठानमा उपचारका लागि आउने बिरामीको संख्या पछिल्लो समय ह्वात्तै बढेको छ। बिरामीको भीडसँगै शय्या अभाव देखिएपछि प्रतिष्ठानले नयाँ भवन निर्माणको तयारी अघि बढाएको छ।
बिज्ञापन
प्रतिष्ठानका रजिष्ट्रार प्रा. श्याम लम्सालका अनुसार चालु आर्थिक वर्षमा बहिरङ्ग (ओपीडी) र अन्तरङ्ग (आईपीडी) गरी हालसम्म २ लाख १८ हजार ७९ जनाले सेवा लिइसकेका छन्। यो संख्या अघिल्ला वर्षहरूभन्दा उल्लेखनीय रूपमा बढी हो।
बिज्ञापन
आर्थिक वर्ष २०८०/८१ मा १ लाख ७६ हजार ९ सय ७४ जना र २०७९/८० मा १ लाख ६० हजार ६ सय ५८ जनाले उपचार सेवा लिएका थिए। निरन्तर बढ्दै गएको बिरामीको संख्याले प्रतिष्ठानमा सेवा विस्तारको आवश्यकता झनै तीव्र भएको देखाएको छ।
रजिष्ट्रार लम्सालका अनुसार पछिल्ला वर्षहरूमा प्रतिष्ठानमा विशेषज्ञ सेवा थपिँदै गएकाले बिरामी आकर्षण बढेको हो। न्युरो सर्जरी सेवा सुरु भइसकेको र आगामी मंसिर महिनाभित्र क्याथ्ल्याब सेवा सञ्चालनमा ल्याई मुटु रोग उपचार प्रारम्भ गर्ने तयारी भइरहेको उनले बताए। साथै, युरोलोजी र युरो सर्जरी सेवा पनि सुचारु अवस्थामा रहेको छ।
बिज्ञापन
बढ्दो मागलाई ध्यानमा राख्दै ४ सय शय्याको नयाँ भवन यसै आर्थिक वर्षमा निर्माण सुरु हुने भएको छ। हाल प्रतिष्ठानमा ३ सय २० शय्या सञ्चालनमा छन्।
सामुदायिक स्वास्थ्य सेवाको दायरा विस्तार गर्दै प्रतिष्ठानले रोल्पाको होलेरी र त्रिवेणीमा सेवा सञ्चालनमा ल्याएको छ। एमबिविएस कार्यक्रम नियमित रूपमा सहज गतिमा सञ्चालन भइरहेको प्रतिष्ठानले जनाएको छ।
राप्ती स्वास्थ्य विज्ञान प्रतिष्ठानमा बिरामीको संख्या तीन वर्षमै करिब ६० हजारले बढेको छ। विशेषज्ञ सेवा, नयाँ प्रविधि र पूर्वाधार विस्तारले यस क्षेत्रको स्वास्थ्य सेवा सहज र आधुनिक बन्दै गएको प्रतिष्ठानको दाबी छ।
