सिन्धुपाल्चोकको भोटेकोशी गाउँपालिका–३ स्थित तातोपानी भन्सार क्षेत्रमा शुक्रबार मध्यराति खसेको सुख्खा पहिरोले तातोपानी भन्सार कार्यालय र सशस्त्र प्रहरी बल, नेपालको बोर्डर आउट पोस्ट (बीओपी) तातोपानीमा ठूलो भौतिक क्षति पुर्याएको छ। घटनाका क्रममा कर्मचारी र सुरक्षाकर्मीहरू मध्यराति भागेर ज्यान जोगाउन सफल भएका छन्।
बिज्ञापन
त्यहाँ कार्यरत कर्मचारीहरूका अनुसार राति करिब १ः१५ बजे एक्कासि ठूलो आवाजसहित डाँडाबाट पहिरो झर्न थालेपछि ढुङ्गा र माटो भन्सार परिसर तथा बीओपीतर्फ खस्न थालेको थियो। “हामी मध्यराति भागेर ज्यान जोगायौं। केहीबेर ढिला भएको भए मानवीय क्षति हुन सक्थ्यो,” एक कर्मचारीले बताए।
बिज्ञापन
प्रारम्भिक जानकारीअनुसार पहिरोका कारण तातोपानी भन्सार कार्यालयमा सबैभन्दा बढी क्षति पुगेको छ। भन्सार परिसरमा जडान गरिएको करिब ३२ करोड रुपैयाँ मूल्यको एक्सरे मेसिनमा समेत क्षति पुगेको स्रोतले जनाएको छ। यस्तै, भन्सारको गोदाममा पनि असर परेको छ। क्षतिको यकिन विवरण र आर्थिक मूल्याङ्कन भने अझै आउन बाँकी रहेको छ।
भन्सारका कर्मचारीहरूका अनुसार पहिरोले प्रशासनिक भवन, उपकरण तथा अन्य भौतिक संरचनामा समेत व्यापक असर पुर्याएको छ। “भन्सार क्षेत्रमा अत्यधिक क्षति भएको छ, विस्तृत विवरण संकलन भइरहेको छ,” एक कर्मचारीले बताए।
सशस्त्र प्रहरी बलका अनुसार बीओपीको उत्तर–पश्चिमतर्फ रहेको करिब २०० देखि ३०० मिटर अग्लो डाँडाबाट सुख्खा पहिरो खस्दा ढुङ्गा उछिट्टिएर प्रहरी संरचनामा क्षति पुगेको हो।
बिज्ञापन
पहिरोका कारण पहिलो लाइन ब्यारेकको एउटा झ्यालको सिसा फुटेको छ भने दोस्रो लाइन ब्यारेकको भित्तामा प्वाल पर्नुका साथै जस्ताको छानामा छ वटा प्वाल परेको छ। एउटा ड्युटी पोस्ट पूर्ण रूपमा क्षतिग्रस्त भएको छ भने अर्को ड्युटी पोस्टमा आंशिक क्षति पुगेको छ। सशस्त्र प्रहरी निरीक्षकको बाथरुमको भित्तामा पनि प्वाल परेको छ। हिमाली ज्याकेट राखिएको स्थान, राष्ट्रिय झण्डाको पोल, जिन्सी स्टोर भवन तथा मुख्य प्रवेशद्वारअगाडिको सिँढीमा समेत क्षति पुगेको सशस्त्र प्रहरीले जनाएको छ।
यद्यपि, घटनामा कुनै मानवीय क्षति भएको छैन। घटनापछि सुरक्षा निकाय, भन्सार कार्यालय तथा सम्बन्धित निकायले क्षतिको विवरण संकलन, जोखिम मूल्याङ्कन र थप सुरक्षा व्यवस्थापनको काम अघि बढाएका छन्। पहिरोबाट भएको वास्तविक क्षति र आर्थिक नोक्सानीको विस्तृत विवरण आउन बाँकी रहेको जनाइएको छ।
