विशेष अदालतले यातायात व्यवस्था कार्यालय पर्साका तत्कालीन अधिकृत कमलराज गौतमलाई अकुत आर्जनको मुद्धामा दोषी ठहर गरेको छ । अघिल्लो बर्ष अख्तियारले गौतमविरुद्ध सार्वजनिक पदको दुरुपयोग गरी गैरकानुनी सम्पत्ति आर्जन गरेको अभियोगमा मुद्धा दायर गरेकोमा आज विशेष अदालतका अध्यक्ष सुदर्शनदेव भट्ट तथा सदस्यहरू डिल्लीरत्न श्रेष्ठ र विदुर कोइरालाको इजलासले उनलाई १ करोड ८ लाख १ हजार ८३८ रुपैयाँभन्दा बढी जरिवाना र १ वर्ष कैदको फैसला सुनाएको हो ।
अख्तियारले गौतमविरुद्ध २ करोड ५१ लाख ७८ हजार ६८७ रुपैयाँ बिगो कायम गरी अघिल्लो बर्ष मुद्धा विशेषमा दायर गरेको थियो । गौतमको २०५५ वैशाख ७ देखि २०७९ चैत २४ सम्मको चलअचल सम्पत्तिमाथि अनुसन्धान गर्दा स्रोत नखुलेको जायजेथा भेटिएपछि त्यसलाई नै बिगो कायम गरी मुद्दा दायर गरिएको हो ।
बिज्ञापन
जागिरे अवधिमा मौज्दात समेत गरी ५ करोड ४० लाख ९८ हजार ९५५ रुपैयाँ बराबरको सम्पत्ति खर्च तथा लगानी गरेको देखिँदा कूल आयबाट खर्च तथा लगानी घटाउँदा २ करोड ५१ लाख ७८ हजार ६८७ रुपैयाँ ऋणात्मक हुन गई स्रोत पुष्टि हुन नसकेको ठहर गर्दै अख्तियार विशेष अदालतमा पुगेको थियो । तर विशेष अदालतले अदालतले गौतमको सार्वजनिक सेवामा प्रवेश गरेको मितिदेखिको विश्लेषण गर्दा कुल वैध आय ३ करोड ४७ लाख ८६ हजार ३८२ रुपैयाँ ३१ पैसा रहेको र कुल व्यय ४ करोड ५५ लाख ८८ हजार २२० रुपैयाँ ५५ पैसा पुगेको निष्कर्ष निकालिएको छ । वैध आयभन्दा व्यय बढी देखिएपछि अदालतले १ करोड ८ लाख १ हजार ८३८ रुपैयाँ २४ पैसा बराबरको सम्पत्ति गैरकानूनी रूपमा आर्जन गरिएको ठहर गरेको हो ।
