बिज्ञापन

बिज्ञापन

पर्यटक भिसामा नेपाल आएका १० विदेशी नागरिकले नक्कली कागजातका आधारमा ‘अध्ययन भिसा’ लिएको खुलेसँगै मन्त्रालयले यस बिषयमा सत्यतथ्य छानबिन गर्ने तीन सदस्यीय समिति बनाएको हो । प्रदर्शनीमार्गस्थित वाल्मीकि विद्यापीठको लेटर हेड किर्ते गरेर तयार पारिएको नक्कली सिफारिस पत्र दोहोरो परीक्षण नै नगरी शिक्षा तथा खेलकुद मन्त्रालयले ८ चिनियाँ तथा एक रसियन र एक कोरियन नागरिकलाई अध्ययन भिसा उपलब्ध गराउन अध्यागमन विभागलाई सिफारिस गरेको भेटिएको थियो । सोही सिफारिसको आधारमा मन्त्रालयले गत जेठ २१ गते अध्यागमन विभागलाई भिसा सिफारिस गरेको पाइएको छ । जसमध्ये आठ जनाको भिसा जारी भइसकेको छ । भिसा पाउनेमा ६ चिनियाँ, एक कोरियन र एक रसियन नागरिक रहेका छन् । उनीहरुले भिजिट भिसामार्फत पटकपटक नेपाल आवतजावत गरेको देखिएको छ ।कागजात अनुसार २ वर्षे ‘एकाडेमिक अध्ययन भिसा’ सिफारिसका लागि वाल्मीकि विद्यापीठको लेटर हेडमा ‘प्राचार्य अच्युतप्रसाद लामिछाने’का तर्फबाट २०८३ जेठ ६ गते शिक्षा तथा खेलकुद मन्त्रालयको स्वयंसेवक परिचालन तथा भिसा सिफारिस शाखालाई पत्राचार गरिएको र सो बिषयमा अध्यागमन विभागले शंका लागेर छानबिन गर्दा विद्यापीठबाट गएको भनिएको पत्र नक्कली रहेको खुलासा भएको हो । अध्ययन भिसाका लागि नक्कली पत्र पेश गरेको आरोपमा दुई जना पक्राउ परेसँगै शिक्षा मन्त्रालयको बदमासी खुलासा भएको छ ।

समितिलाई घटनासँग सम्बन्धित मन्त्रालयका कर्मचारीहरूको भूमिका तथा जिम्मेवारीबारे आवश्यक अनुसन्धान गरी सात दिनभित्र प्रतिवेदन पेस गर्ने कार्यादेश दिइएको मन्त्रालयले जनाएको छ । अध्ययन भिसा सिफारिस प्रक्रियामा कर्मचारीहरूको संलग्नता, कागजात प्रमाणीकरणको अवस्था तथा प्रक्रियागत कमजोरीबारे समेत समितिले अध्ययन गर्नेछ ।