सरकारले संसद् अधिवेशन स्थगित गरिसकेको अवस्थामा अध्यादेशमार्फत केही महत्वपूर्ण निर्णय अघि बढाउने तयारी गरेको छ । मन्त्रिपरिषद् बैठकबाटै सो प्रक्रिया अघि बढाउने संकेत देखिएको छ ।
बिज्ञापन
सोमबार दिउँसो बस्ने मन्त्रिपरिषद् बैठकमा संवैधानिक परिषद्सम्बन्धी लगायतका विषय समेटेर अध्यादेश ल्याउने प्रस्ताव प्रस्तुत हुने तयारी भएको उच्च स्रोतले जनाएको छ । संसद् बैठक नबस्ने अवस्थालाई उपयोग गर्दै सरकारले अध्यादेशमार्फत कानुनी व्यवस्था अघि बढाउने रणनीति बनाएको बताइएको छ ।
बिज्ञापन
यसअघि सरकारकै सिफारिसमा राम चन्द्र पौडेलले १७ वैशाखका लागि संघीय संसद्को अधिवेशन आह्वान गरेका थिए । तर त्यसको भोलिपल्टै फेरि सरकारकै सिफारिसमा अधिवेशन स्थगित गरिएको थियो ।
संसद् अधिवेशन स्थगित गरिएपछि अध्यादेशमार्फत संवैधानिक परिषद्सम्बन्धी व्यवस्था अघि बढाउने तयारीले राजनीतिक वृत्तमा नयाँ बहस सुरु भएको छ । संसद् बोलाएर छलफल नगरी अध्यादेशमार्फत संवेदनशील विषय अघि बढाउन खोजिएको भन्दै सत्ता र प्रतिपक्षबीच विवाद बढ्ने संकेत पनि देखिएको छ ।
