सरकारले जागिरे जीवनको लामो कालखण्ड सिंहदरबारस्थित मन्त्रालय,आकर्षक कार्यालयमा कार्यरत रहेका कर्मचारीहरुलाई खोजी खोजी स्थानीय तहमा खटन पटन गर्न थालेसँगै केही कर्मचारीहरुले पारिवारिक र स्वास्थ्यको कारण देखाउँदै सेवाबाटै राजीनामा दिन थालेका छन् । लामो समय सिंहदरबार आसपास कार्यरत रहेका शाखा अधिकृतहरुलाई नयाँ सरकारले स्थानीय तहमा खटन पटन गरेको थियो,केही अगाडि । तिनै मध्येका दुई जना शाखा अधिकृतको राजीनामा होल्डमै रहेको अवस्थामा अर्काे शाखा अधिकृतले आजैमात्र सरकारी सेवाबाटै राजीनामा दिएका हुन ।
संघीय मामिला तथा सामान्य प्रशासन मन्त्रालयले स्थानीय तहमा खटाएपछि दार्चुलाको व्यास गाउँपालिकामा प्रमुख प्रशासकीय अधिकृतका रूपमा पठाइएका हरि पौडेल र नुवाकोटको तारकेश्वर गाउँपालिकामा खटाइएका शेखरनिधि पौड्यालले राजीनामा दिएका हुन्।दुवै अधिकृतले व्यक्तिगत कारण देखाउँदै पदबाट राजीनामा दिएका छन्। दुवै अधिकृतको राजीनामा मन्त्रालयमा बुझाएको भए पनि सो राजीनामा स्वीकृत नहुँदै अर्काे शाखा अधिकृत गणेश घिमिरेले सेवाबाट राजीनामा दिएका छन् । संघीय मामिला तथा सामान्य प्रशासन मन्त्रालयले हालैमात्र ६ जना शाखा अधिकृतको सरुवा गरेको थियो । सो सूचीमा गणेश घिमिरेलाई अछामको मल्लेख गाउँपालिका पठाइएको थियो । यसरी सिंहदरबारबाट स्थानीय तहमा खटाइएका घिमिरेले पनि पदबाट राजीनामा दिएका हुन ।
बिज्ञापन
जेनजी विद्रोह पछि सार्वजनिक प्रशासन रूपान्तरण अभियानका संयोजकसमेत रहेका घिमिरेले सोमबार राष्ट्रिय प्राकृतिक स्रोत तथा वित्त आयोगका सचिवसमक्ष राजीनामा बुझाएका हुन । घिमिरे २०६७ पुस २० गते सरकारी सेवामा प्रवेश गरेका हुन ।, जागिरे अवधिमा प्रधानमन्त्री तथा मन्त्रिपरिषद् कार्यालय, राष्ट्रिय योजना आयोग, श्रम मन्त्रालय लगायतका निकायमा काम गरेका थिए।
उसो त हालैमात्र प्रधानमन्त्रीको टेबलमा काठमाडौं नछाड्ने र दुई बर्षभन्दा लामो समयदेखि सिंहदरबार र उपत्याकामा राज गरिरहेका पाँच हजार तीन कर्मचारीको सूची बुझाइएको छ । सो सूची बुझाए लगतै प्रधानमन्त्री कार्यालयमै पाँच बर्षदेखि बसिरहेका केही उच्च पदस्थ कर्मचारीहरुले लामो समय घर विदा लिएको समेत खुलेको छ ।
बिज्ञापन
