उज्यालो नेपाल पार्टीले प्रतिनिधि सभा निर्वाचनका लागि आफ्नो प्रतिबद्धता पत्र सार्वजनिक गरेको छ । गफ होइन काम, भाषण होइन परिणाम’ भन्ने मूल नारासहित सार्वजनिक आइतबार राजधानीमा आयोजित कार्यक्रममार्फत गरिएको घोषणापत्रमा भ्रष्टाचारी ठहर भएको व्यक्तिलाई सार्वजनिक पदमा आजीवन प्रतिबन्ध लगाउने उनेपाको प्रतिबद्धता पत्रमा उल्लेख छ ।
घोषणापत्रमा भनिएको छ भ्रष्टचारीलाई आजीवन सार्वजनिक पदमा प्रतिबन्ध लगाउनुका साथै निजको सम्पत्ति राष्ट्रियकरण गरिनेछ । भ्रष्टाचारविरुद्ध शून्य सहनशीलताको नीति लिँदै पार्टीले भ्रष्टाचारीलाई सार्वजनिक पदमा आजीवन प्रतिबन्ध लगाउने र निजको सम्पत्ति राष्ट्रियकरण गर्ने कठोर प्रतिबद्धता जनाएको छ । साथै, मतदातालाई उम्मेदवार मन नपरे ‘नो भोट’ को विकल्प दिने विषय पनि घोषणापत्रमा समेटिएको छ । भ्रष्टचार नियन्त्रणका लागि उज्यालो हटलाइन र सूचनादाता पुरस्कार कोष स्थापना गर्ने उज्यालो नेपालले प्रतिबद्धता पत्रमा उल्लेख गरेको छ । भ्रष्टाचारविरूद्ध उजुरी दिने व्यक्तिलाई अदालतको अन्तिम फैसलाबाट ठहर भएको रकमको ५ प्रतिशतले हुनआउने रकम सूचनादातालाई पुरस्कारवापत उपलब्ध गराउने प्रतिबद्धता गरिएको छ ।

बिज्ञापन

प्रशासनलाई डिजिटल, पारदर्शी र जवाफदेही बनाउने प्रतिबद्धता गरेको उनेपाले सार्वजनिक पदाधिकारी र कर्मचारीको सम्पत्ति विवरण बुझाउने र सार्वजनिक गर्ने व्यवस्था गर्ने जनाएको छ ।
यस्तै सो पार्टीको प्रतिवद्धतापत्रमा प्रत्यक्ष निर्वाचित मुख्यमन्त्रीको एजेण्डालाई अघि सारिएको छ । राज्यमाथि परिरहेको आर्थिक भारलाई कम गर्न प्रतिनिधिसभा सदस्य संख्या २७५ बाट २०१ कायम तथा प्रदेश सभा सदस्यको संख्या कटौती गरेर ५५० बाट ३३० कायम गर्न प्रस्ताव गरिनेछ’, पत्रमा उल्लेख छ । नागरिकलाई परिवारसँगै बसेर रोजगारी गर्न र उत्पादनमा रमाउने वातावरण सिर्जना गर्न पार्टीले ४० वर्षमुनिका युवाहरुलाई टार्गेट गरेर पार्टीले सीप विकास तालिमहरु चलाउने र प्रतिवर्ष १५ लाख रोजगारी सिर्जना गर्ने उद्देश्य राखेको छ ।