नेपाल बीमा प्राधिकरण अध्यक्ष पदका लागि १२ जनाको आवेदन परेको छ । आवेदन दिनेमा पूर्व सचिव,वीमा प्राधिकरणका पूर्व अध्यक्ष,कार्यकारी निर्देशक,यस अगाडि नै सरकारी निकायमा काम गरिसकेका पूर्व महाप्रवन्धक लगायत रहेका छन् ।
बिज्ञापन
अर्थ मन्त्रालयका अनुसार अध्यक्ष पदमा नियुक्तिका लागि गठित सिफारिस समितिले माग गरेको आवेदनमा १२ जनाले दरखास्त दिएका छन् । जसमा कमलप्रसाद रेग्मी, डा देवराज रोका, शरद ओझा, चीरञ्जीवी चापागाईं, विष्णुबाबु मिश्र, बुद्धकाजी श्रेष्ठ, दामोदर बसौला, डिमप्रसाद पौडेल, रामशरण पुडासैनी, विक्रान्त पाण्डे, रमण नेपाल र विनोदकाजी श्रेष्ठको आवेदन परेको मन्त्रालयले जनाएको छ । आवेदकमध्ये रेग्मी बीमा प्राधिकरणकै कार्यकारी निर्देशक हुन् भने चापागाईं प्राधिकरणका पूर्वअध्यक्ष हुन् । त्यस्तै पुडासैनी पूर्वराजस्व सचिव, पौडेल नेपाल वायुसेवा निगमका पूर्वमहाप्रबन्धक, बसौला स्वास्थ्य बीमा बोर्डका पूर्वकार्यकारी निर्देशक र नेपाल नागरिक लगानी कोषका पूर्वकार्यकारी निर्देशक हुन् ।
बिज्ञापन
नागरिकता किर्तेको अभियोगमा अख्तियार दुरुपयोग अनुसन्धान आयोगले यसअघिका अध्यक्ष सूर्यप्रसाद सिलवालविरुद्ध मुद्दा दायर गरेपछि सो पद रिक्त छ । नयाँ नियुक्तिका लागि राष्ट्रिय योजना आयोगका उपाध्यक्ष प्रा डा शिवराज अधिकारीको संयोजकत्वमा गठित सिफारिस समितिले पुस २६ गते १५ दिनको समय दिएर आवेदन माग गरेको थियो ।
आवेदकमध्ये पूर्व राजश्व सचिव पुडासैनी सशक्त दावेदार मानिएका हुन । उनी कृषि विकास बैंकका अध्यक्ष समेत चलाइसकेका कर्मचारी हुन । यस्तै यस अघि नेपाल राष्ट्र बैंकबाट अवकाश पाएका रमणलाई नागरिक लगानी कोषको कार्यकारी निर्देशक र बसौला स्वास्थ्य बीमा बोर्डको कार्यकारी निर्देशक चलाइसकेका प्रशासकहरु हुन ।
बिज्ञापन
समितिले आवेदकमध्येबाट सर्टलिस्ट गरी कार्ययोजना प्रस्तुतीकरण गर्न लगाइ अन्तर्वार्ता लिएर तीन जनाको नाम सिफारिस गर्नेछ। समितिको सिफारिसमा पर्नेमध्ये एक जनालाई मन्त्रिपरिषद्ले प्राधिकरणको अध्यक्ष नियुक्त गर्नेछ।
