बिज्ञापन
बिहान मन्त्रीलाई खादा,मालासहित बधाई दिन अर्थ मन्त्रालय पुगेका अटेरी सहसचिव बेलुकै जेनेभातिर उडेका छन्,त्यो पनि सरुवा भइसकेको कार्यालयको खर्चमा । यस्तोमा अख्तियार सिधै आकर्षित हुनुपर्ने हो तर पावरवाला सहसचिवलाई अख्तियारले केही लछार्न सक्दैन रहेछ ।
बिज्ञापन
अर्थका अधिकारीहरुलाई चक्मा खुवाउँदै विदेश हानिने सहसचिव हुन सेवन्तक पोखरेल,जो भन्सारका हाकिम शोभाकान्त पौडेलको साथ लागेर अस्ति सोमबार जेनेभा उडेका हुन । महिना दिन अगाडि नै भन्सार विभागबाट अर्थ हुँदै त्रिभुवन विमानस्थल भन्सार कार्यालयमा खटाइएका सेवन्तक खटाएको ठाउँमा जान इन्कार गर्दै आएका छन् । अर्थले पठाएको सरुवाको पत्र बीचबाटैबाट गायब पारेर उनी महिनौदेखि बिदा लिएर बसिरहेका छन् । अघिल्लो महिना सामान्य प्रशासनले २९ सहसचिवको सरुवाको सूची क्याविनेटमा पठाएको थियो तर प्रमाणीकरण भएर आउँदा सेबन्तक पोखरेलको नाम गायब बनाइको थियो । अर्थमन्त्री प्रकाशशरण महतले उनलाई भन्सार विभागको उपमहानिर्देशकबाट त्रिवि भन्सार कार्यालयमा खटाएका थिए तर महिना भन्दा बढी समय व्यतित भइसक्दा समेत उनी हाजिर हुन गएनन । बरु विदा लिएर बसेका छन् । त्रिवि भन्सार स्रोतका अनुसार सरुवाको चिठ्ठी नै त्यहाँ पुग्न पाएन,बीचबाटै पत्रै गायब बनाएको आरोप उनीमाथि लाग्दै आएको छ ।
यस अघि सेवन्तको कार्यरत रहेको भन्सार विभागको उपमहानिर्देकको कुर्सीमा टंकप्रसाद पाण्डेय हाजिर भइसकेका छन् । सेवन्तकलाई अर्थले भन्सारमा खटाएसँगै त्यहाँका हाकिम टोकराज पाण्डे अर्थमै फिर्ता भएर कर्मचारी प्रशासन सम्हालिरहेका छन् । जेनेभामा पाँच दिनसम्म चल्ने भन्सारसम्बन्धि नै कार्यक्रममा जानुपर्ने पात्र थिए,टंकप्रसाद । तर उनको भाग खोसेर,त्यहाँबाट सरुवा भइसकेका सेवन्तक जेनेभा उडेका हुन । शोभाकान्त र सेवन्तकहरु आगामी ५ चैत्रमा स्वदेश फर्कने कार्यक्रम छ । पोखरेल यसअघि उपसचिव भएकै बेला फागुन २०७७ सम्म वीरगञ्ज भन्सार कार्यालयमा २ वर्ष प्रमुख भन्सार प्रशासक चलाइसकेका हुन । यस अघि विराटनगरसहित विभिन्न आकर्षक मानिने भन्सार कार्यालयमा पनि काम गरेका थिए ।
बिज्ञापन
२०७८ फागुनमा सहसचिवमा बढुवा भएपछि सञ्चार तथा सूचना प्रविधि मन्त्रालयमा काम गरेका पोखरेल विष्णु पौडेल अर्थमन्त्री भएलगत्तै अर्थ मन्त्रालयमै फर्कन सफल मात्र भएनन् । बजेट निर्माणका बेला उनी भन्सार विभागमा निमित्त महानिर्देशकको भूमिकामा थिए । विराटनगर भन्सार प्रमुख,वीरगञ्ज भन्सार अधिकृत हुँदै प्रमुख अधिकृत बनेर पूरा कार्यकाल बसेर कमाएका कर्मचारीको रुपमा अर्थभित्र चिनिन्छन् । त्यसपछि उनी कलकत्तास्थित बन्दरगाहमा बसे । कलकत्ता हुँदै यता सहसचिवमा पदोन्नति भएपछि फेरि भन्सार विभागमा फर्किएका उनी भन्सारमै रहँदा दरबन्दीमा कार्यरत ६८ जना कर्मचारीको काज सरुवा गरी दरबन्दी बेगरको कार्यालयमा पठाएर कुस्त आर्जन गरेको आरोप छ उनीमाथि । पोखरेल उपसचिव हुँदा अर्थमन्त्रालयका सय भन्दा बढी राजस्व समूहका कर्मचारीमध्ये राम्रो अवसर पाउनेमा पर्दछन् ।
यता, पछिल्लो समय अख्तियार,सिआइबीदेखि नियामक निकायको तारो बन्न थालेपछि त्रिवि भन्सारमा जाने कर्मचारीको खडेरी लाग्न थालेको छ । यही बीचमा भिजिट भिसा प्रकरणमा मुछिएका आठमध्ये सात जना कर्मचारीहरुले काठमाडौं जिल्ला अदालतमा जनही सात लाख धरौटी बुझाएर उन्मुक्ति पाएका छन् ।
उता, अर्थमन्त्री बर्षमान पुनले आफ्नो कोर टिम नै परिवर्तन गर्ने तयारी गरिरहेका छन् । माघ १९ गतेमात्र आन्तरिक राजस्व विभागको जिम्मेवारी सम्हाल्न गएका भुपाल बराललाई फिर्ता ल्याउने र त्यहाँ वन विभागमा रहेका शिवलाल तिवारीलाई पठाउने गृहकार्य चल्दैछ । शिवलाल अफिसर हुँदा राजश्व,उपसचिव हुँदा लेखामा काम गरेका कर्मचारी हुन ।उसो त अबको केही महिना पछि नै भुपाल सचिव बढुवा हुँदैछन् । अर्थ मन्त्रालयको नेतृत्वको माओवादीको काँधमा आएसँगै माओवादी निकटका १८/१९ सहसचिवहरु मन्त्रालयका विभिन्न महाशाखा,विभाग ताक्दै शक्तिकेन्द्र धाइरहेका छन् । भुपाललाई फिर्ता ल्याएपछि त्यहाँ शिवलाल,ढुण्डी निरौलामध्ये एकलाई पठाउने गृहकार्य चल्दैछ ।
यस्तै भन्सार विभागको महानिर्देशक शोभाकान्त पौडेलको ठाउँमा यस अघि भन्सार विभागको नेतृत्व चलाइसकेका कमल भट्टराईलाई पठाउने गृहकार्य भइरहेको छ । यस अघि प्रकाशशरण महतको कोर टिममा रहेर काम गरेका उत्तरकुमार खत्री,महेश आचार्यहरु पनि रेड जोनमा छन् । बजेट महाशाखा हेर्दै आएका उत्तरकुमार खत्री ज्ञानेन्द्र कार्कीका दाहिने हात मानिन्छन् । सञ्चारमा ज्ञानेन्द्र हुँदा उनकै सहयोगीका रुपमा कार्यरत रहेका खत्री यस अघि बजेट महाशाखामा रहेर गडबडी गरेको बिषयमा अख्तियारले टंगालमै बोलाएर उनीसँग बयान लिइसकेको छ । यी बाहिरिएको खण्डमा त्यहाँ ढुण्डी निरौलादेखि रामप्रसाद आचार्यहरुलाई भित्र्याउने तयारी चल्दैछ । सहससचिवमात्र होइन निजामती प्रशासनमा फेरि सचिवहरु नै भकुण्डो बन्ने मौसम शुरु भएको छ । अर्थमा कृष्णहरिको ठाउँमा ल्याउने सचिव भेटिएको छैन ।माओवादी निकटका प्रशासकका रुपमा चिनिएका रामकृष्ण सुवेदी र कृष्ण राउतमात्र हुन । रामकृष्ण सञ्चारबाट अर्थ ताक्दैछन् तर प्रधानमन्त्री प्रचण्डले उनलाई सञ्चारमै अडाउन चाहिरेका छन् ।
