धुर्मुस सुन्तलीले अलपत्र पारेर छाडेको गौतम बृद्ध अन्तराष्ट्रिय क्रिकेट रंगशाला निर्माणका लागि टेण्डर खुलाइएको छ । भरतपुर महानगरपालिकाले रंगशालाको पहिलो चरणको निर्माण कार्यका लागि १ अर्ब १० करोड रुपैयाँको टेण्डर आह्वान गरेको हो । महानगरले बिहीबार एक सार्वजनिक सूचना जारी गर्दै इच्छुक र योग्य कम्पनीलाई एक महिनाभित्र आवेदन पेस गर्न आह्वान गरेको छ । रंगशाला निर्माणको लागि छनौट भएको कम्पनीले साढे २ वर्षभित्र रंगशाला बनाइसक्नु पर्नेछ । रंगशालाको सबै काम पुरा गर्न साढे ३ अर्ब रुपैयाँ लाग्छ । पहिलो चरणको काम पुरा भएपछि दोस्रो चरणको निर्माण सुरु हुने महानगरपालिकाले जनाएको छ ।
बिज्ञापन
यसअघि बागमती सरकार र भरतपुर महानगरपालिकाले क्रमशः ७० र ३० को साझेदारीमा रंगशाला निर्माण गर्ने सहमति भएसँगै अलपत्र अवस्थामा रहेको रंगशाला निर्माण गर्ने निश्चित भएको थियो ।
बिज्ञापन
३० दिनको म्याद राखी खुलाइएको टेण्डरको प्रस्ताव ३१ औं दिनमा खोलिने र प्राप्त प्रस्तावहरूको मूल्यांकन गरी छनोट भएको कम्पनीलाई दुई हप्ताभित्रै जिम्मा दिइने महानगरले उल्लेख गरेको छ ।
०७५ माघमा सम्झौतामा फाउण्डेशनले करिब ३ अर्ब रूपैयाँ आर्थिक स्रोत जुटाएर २ वर्षभित्र नेपाली मौलिकता झल्कने आकर्षक, कलात्मक, सुविधासम्पन्न अन्तर्राष्ट्रिय स्तरको बहुउद्देश्यीय क्रिकेट रंगशाला निर्माण गर्ने, निर्माण कार्य सकिएपछि फाउण्डेशनले भरतपुर महानगरपालिकालाई हस्तान्तरण गर्ने उल्लेख थियो ।
बिज्ञापन
तर काम शुरु भएको दुई वर्षमै फाउन्डेशनले पर्याप्त आर्थिक स्रोत नजुटेको भन्दै रंगशाला निर्माणबाट हात झिक्यो । रंगशालाको निर्माण छाड्दै गर्दा धुर्मुस सुन्तलीले सामाजिक सञ्जालमा लाइभ नै आएर आफूहरु १८ करोड ऋणमा परेको समेत दावी गरेका थिए ।
अन्ततः लामो उतार चढावका बाबजुद गत कात्तिकमा महानगरले बाग्मती प्रदेश सरकारसँग सहयोग मागेपछि आज नयाँ टेण्डर खोलिएको छ । अब निर्माण खर्चमा लाग्ने बजेटको ३० प्रतिशत प्रदेश सरकारले सहयोग गर्नेछ भने बाँकी ७० प्रतिशत रकम महानगरले नै जुटाउँदैछ ।
