महिला मन्त्रीबाट महिला कर्मचारीहरु लखेटिएका छन् । प्रधानमन्त्री सुशीला कार्कीको पालामा एउटा विषय निकै चर्चित थियो– संघीय मामिला मन्त्रालय महिलाहरूले हाँकिरहेको । रामेश्वर खनाल सामान्य प्रशासनमन्त्रीसमेत थिए । अर्थ मन्त्रालयमा बस्थे र संघीय मन्त्रालयको बागडोर कर्मचारीलाई जिम्मा लगाएका थिए । विभागीय मन्त्रीले कर्मचारीलाई विश्वास गर्नुपर्छ भन्ने मानक बसाल्न खोजेका थिए । रविलाल पन्थलाई सरुवा गरेर पहिलो महिला सचिवको रुपमा चन्द्रकला पौडेल सामान्य प्रशासनमा भित्रिइन नीता पोखरेल,पार्वती शर्मा र मीरा आचार्यहरु सोही मन्त्रालयमा थिए । ६ वटा महाशाखामध्ये ३ वटा शाखाको प्रमुख महिला सहसचिवहरुलाई जिम्मेवारी दिइदा कर्मचारी सरुवामा हुँदै आएको विकृती करिब करिब अन्त्यको स्थितिमा थियो । तर फागुन २१ को निर्वाचनमार्फत बालेन्द्र साहको नेतृत्वमा सरकार बन्यो । संघीय र सामान्य प्रशासनमन्त्री भइन् प्रतिभा रावल । त्यहाँकी मन्त्री, सचिव र सहसचिव जम्मै महिला नै थिए । घुस, सेटिङ, अनियमितता र बिचौलियाको खेल न्यूनीकरण भएको थियो । यही मान्यतालाई सीपीएको भूमिकामा रहेको संघीय मामिला तथा सामान्य प्रशासन मन्त्रालय र सिंगो सरकारले उल्ट्याइदिएको छ— र त्यो पनि महिला मन्त्रीकै प्रयासमा ।
बिज्ञापन
यसरी सुशासन कायम भएको,महिलाको टिम भन्ने प्रशंसा स्वयं मन्त्रीलाई मन परेन । र, सहसचिवहरू पार्वती शर्मा र निता अर्याललाई प्रदेशतिर पठाइदिइन् । पहिल्यै प्रदेशमा बसेर आएका सहसचिवहरूलाई यसरी दोह्रोएर प्रदेशमा खटाइएको हो । सामान्यतया सरकारले एकपटक प्रदेशमा बसिसकेका सहसचिवलाई फेरि प्रदेशमा नै सरुवा नगर्ने परम्परा रहँदै आएको छ । शर्माले यसअघि अख्तियार दुरुपयोग अनुसन्धान आयोगको गण्डकी प्रदेशस्थित कार्यालयमा १३ महिना र पोखरेलले लोकसेवा आयोगको वाग्मती प्रदेशमा रहेर काम गरिसकेका कर्मचारी हुन । सहसचिवबाट शुरु भएको खेदाइ सचिव चन्द्रकला पौडेलसम्म आइपुग्यो । सामान्य प्रशासन मन्त्रालय गाभिएर भूमि व्यवस्था, सहकारी र सामान्य प्रशासन मन्त्रालय गठन भयो । अब यहाँबाट सचिव मदन भुजेल र चन्द्रकला पौडेलमध्ये एकको सरुवा हुने थियो । यस्तो बेला मन्त्रीले रोजिन् भुजेललाई र महिलालाई लखेटिन् । चन्द्रकला पौडेलको सरुवा भयो उपराष्ट्रपति कार्यालयमा । अहिले सो मन्त्रालयका सचिव मदन भुजेल र सहसचिवहरुमा संघीय मामिला तथा योजना तथा विकास सहायता महाशाखा प्रकाश दाहालले हेर्दै छन् । यस्तै,क्षमता विकासमा डिलाराम पन्थी,कर्मचारी प्रशासन महाशाखामा धोलकरामल ढकाल,प्रवक्ताको भूमिकामा एकदेव अधिकारी रहेका छन् ।
पछिल्लो समय अख्तियारले डामेकाहरूलाई ठाउँ दिने जालोमा मन्त्री रावल परेको कारण सुशासनको पक्षमा उभिने कर्मचारी एकपछि अर्को गरी खेदिन लागेको कर्मचारीहरूले बताएका छन् । ‘विगतका सरकारले सेटिङ गरे भनेको त अहिले झन डरलाग्दो सेटिङ हुँदैरहेछ ।’ अर्का सहसचिवले भने, ‘नतिजा नहेर्ने, क्षमता नहेर्ने, वरपर घुम्नेहरूलाई मात्रै प्राथमिकता दिने हो भने केको परिवर्तन ! बरु भने भइहाल्यो नि हामी पनि उस्तै हौं ।’ कर्मचारी सरुवामा भएका सेटिङ र उठ्ती–पुठ्तीहरू विस्तारै बाहिर आउने सरोकारवालाहरु बताउँछन् ।
