सरकारले पूर्वगृहमन्त्री सुधन गुरुङमाथि मन्त्री हुँदा र त्यसपछि उठेका सार्वजनिक सरोकारका विषयमा अध्ययन तथा छानबिन गर्न समितिको म्याद पाँच दिन थप गरेको छ ।
गत वैशाख २८ गतेको बैठकले उच्च अदालतका पूर्वन्यायाधीश अच्यूतप्रसाद भण्डारी अध्यक्ष, महालेखा नियन्त्रक शोभाकान्त पौडेल र सहन्यायाधिवक्ता अच्युतमणी नेउपाने सदस्य रहने गरी गठित समितिलाई सार्वजनिक रुपमा उठेका विषयमा सत्यतथ्य अध्ययन तथा छानबिन गरी सरकारसमक्ष रायसुझावसहित १५ दिनभित्र प्रतिवेदन बुझाउने जिम्मेवारी दिइएको थियो ।
बिज्ञापन
प्रतिनिधिसभा सदस्यसमेत रहेका गुरुङमाथि दुईवटा माइक्रो लाइफ इन्स्योरेन्समा गरेको लगानीमाथि प्रश्न उठेको थियो । त्यस्तै उनीसँग रहेको ८९ तोला सुन, जग्गा र विभिन्न कम्पनीको सेयरलाई लिएर आम्दानीको स्रोतमाथि प्रश्न उठेको थियो । दुई वटा माइक्रो लाइफ इन्स्योरेन्स कम्पनीको संस्थापक शेयर खरिद गरेकामा विवादास्पद व्यापारी दीपक भट्टसँगको सम्बन्ध रहेको आरोप लागेसँगै विवादमा तानिएका पूर्व गृहमन्त्री गुरुङमाथि छानबिन गर्न समिति गठन भएकोमा निर्धारित सयमभित्र प्रतिवेदन पेश गर्न नसकेका कारण आजबाट लागू हुने गरी पाँच दिन म्याद थप भएको हो । विवाद चर्किँदै गएपछि उनले गत वैशाख ९ गते गृहमन्त्रीबाट राजीनामा दिएका थिए।
