फागुन २१ गते भएको प्रतिनिधि सभा सदस्य निर्वाचनको नतिजा आउने क्रम अन्तिम चरणमा पुगेको छ । प्रत्यक्षतर्फ १६५ मध्ये अब मात्र ४ सिटको नतिजा आउन बाँकी रहेको छ । पछिल्लो मत परिणाम अनुसार राष्ट्रिय स्वतन्त्र पार्टी, नेपाली कांग्रेस र नेकपा एमालेले एक एक सिटमा अग्रता बनाइरहेका छन् । रास्वपाले गोरखा १ मा, नेपाली कांग्रेसले इलाम १ मा तथा नेकपा एमालेले सङ्खुवासभा १ मा अग्रता बनाइरहेको छ । धनुषा १ को भने मत परिणाम हाल सार्वजनिक नगर्ने निर्वाचन आयोगले निर्णय गरेको छ ।
बिज्ञापन
हालसम्म रास्वपाले सर्वाधिक १२४ सिट जितिसकेको छ । दोस्रो स्थानमा रहेको कांग्रेसले १७ तथा एमालेले ८ सिट जितेको छ । नेपाली कम्युनिस्ट पार्टी ७ सिटसहित चौथो स्थानमा छ । यस्तै श्रम संस्कृति पार्टीले ३ सिट र राष्ट्रिय प्रजातन्त्र पार्टीले १ सिट जितेको छ भने १ जना स्वतन्त्र उम्मेदवार विजयी भएका छन् ।
बिज्ञापन
हालसम्म सार्वजनिक भएको मतपरिणाम अनुसार, राष्ट्रिय स्वतन्त्र पार्टीका वरिष्ठ नेता बालेन्द्र साह ६८ हजार ३४८ मत प्राप्त गरी निर्वाचित भएका हुन् । उनीसँग चुनावी प्रतिस्पर्धामा रहेका नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले १८ हजार ७३४ मत मात्र प्राप्त गरेका छन् । झापा–५ मा पहिलोपटक चुनाव लडेका बालेनले यस क्षेत्रबाट २०४८ यता लगातार आठौँपटक चुनाव लडेका ओलीलाई सर्वाधिक ४९ हजार ७१४ मतान्तरले पराजित गरेका हुन् । यस्तै,रूपन्देही– ३ मा डा लेखजंग थापा ५८ हजार ८१४ मतसहित विजयी भए । नेपाली कांग्रेसका सुशील गुरुङले ८ हजार ४३५ मत पाए । थापा ५० हजार ३७९ मतान्तरले विजयी भएका छन् ।
उता,रूपन्देही– २ मा सुलभ खरेल ५६ हवार ५५० मतसहित विजयी भएका छन् । एमालेका प्रभावशाली नेता विष्णुप्रसाद पौडेलले १२ हजार ८६१ मत मात्रै पाए । खरेलको मतान्तर ४३ हजार ६८९ छ । मोरङ– ६ मा रुविना आचार्य ५५ हजार ५१३ मतसहित विजयी भइन् । कांग्रेसका डा। शेखर कोइरालाले १२ हजार ८५० मत पाए । आचार्य ४२ हजार ६६३ मतान्तरले विजयी भइन् ।चितवन ३ बाट सोबिता गौतम ५९ हजार २७७ मत प्राप्त गर्दै निर्वाचित भएकी हुन् । उनले नेपाली कम्युनिस्ट पार्टीकी उम्मेदवार रेनु दाहाललाई ३८ हजार ६ सय ६२ मतान्तरले पराजित गरेकी हुन् । सोबिताले ५९ हजार मत कटाउँदा रेनुले भने २० हजार ६ सय १५ मत मात्र प्राप्त गरिन् । यस्तै,काभ्रे–२ बाट बदनकुमार भण्डारीले ५३ हजार ३४४ मत प्राप्त गरेर निर्वाचित भए । नेपाली कांग्रेसका मधु आचार्य १७ हजार ८६८ मत पाएर निकटतम प्रतिद्वन्द्वी भए । उता,चितवन–२ मा रवि लामिछानेले ५४ हजार ४०२ मत ल्याएर निर्वाचित भए । कांग्रेसकी मिना खरेल १४ हजार ५६४ मत ल्याउँदै निकटतम प्रतिद्वन्द्वी भए ।
केही स्थानमा धेरै क्षेत्रमा ५० हजारभन्दा बढी मतान्तरले हार जित हुँदा ओखलढुंगा यस्तो एउटा जिल्ला बन्यो जहाँ केही उमेद्धार ५ मतान्तरले पनि विजयी भएका छन् । ओखलढुंगा क्षेत्र नम्बर १ मा कांग्रेसका कुमार लुइँटेल प्रहरीका पूर्व एआइजीसँग जम्मा ५ मतको अन्तरले हार्न पुगेका छन् । उनले रास्वपाका विश्वराज पोखरेलसँग ५ मतको साँघुरो हार बेहोरेका हुन् । पोखरेलले १३ हजार ९५३ मत ल्याएर विजयी हुँदा लुईटेलले १३ हजार ९४८ मत प्राप्त गरेका छन् ।
बिज्ञापन
एक हजारभन्दा कम मतान्तरले हार जित भएका ९ वटा क्षेत्र रहेको भेटिन्छ । सिन्धुली १ मा नेकपा एमालेका प्रदीप कुमार कटवाल क्षेत्री ७ सय ८४ मतान्तरले पराजित भएका छन् । सो निर्वाचन क्षेत्रबाट रास्वपाका धनेन्द्र कार्की १६ हजार ६५९ मत प्राप्त गर्दा क्षेत्रीले १५ हजार ८७५ मत पाए । यता, बागलुङ क्षेत्र नम्बर २ बाट नेपाली कांग्रेसका टेकराज पौडेल ७ सय ७९ मतान्तरले पराजित भएका छन् । उनलाई रास्वपाका उम्मेदवार सोम शर्माले पराजित गरे । पौडेलले ११ हजार ८६८ र शर्माले १२ हजार ६४७ मत ल्याए ।
यस्तै,नेकपा एमालेका उपाध्यक्ष गोकर्ण विष्ट गुल्मी क्षेत्र नम्बर २ बाट प्रहरीका पूर्व डिएसपीसँग थोरै मतान्तरले पारजित भएका छन् । विष्ट रास्वपाका गोविन्द पन्थीसँग ५ सय ६१ मतले पछि परे । विष्टले १६ हजार ९६७ मत पाउँदा पन्थीले १६ हजार ४०६ मत पाए । यस्तै क्षेत्र परिवर्तन गरेर तेह्रथुम उक्लिएका भानुभक्त ढकाल रास्वपाका सन्तोष सुब्बासँग ८ सय ७९ मतले पछि पर्दा भानुभक्तको संसद् छिर्ने ढोका बन्द भयो । ढकालले १० हजार ६८२ र सुब्बा ११ हजार ५६१ मत ल्याए ।
उता,दैलेख क्षेत्र नम्बर १ मा पनि एमालेका उम्मेदवार साँघुरो मतान्तरले पराजित हुन पुगे । उक्त क्षेत्रमा एमालेबाट उम्मेदवार बनेका रविन्द्र राज शर्मा कांग्रेसकी बासना थापासँग ५ सय ७६ मतले हार ब्योहोरे । शर्माले ११ हजार ७९६ र थापाले १२ हजार ३७२ मत प्राप्त गरे ।
यस्तै,बाजुरा क्षेत्र नम्बर १ मा एमालेका उम्मेदवार लालबहादुर थापा कम मतान्तरले पराजित हुन पुगे । उनी कांग्रेसका जनकराज गिरीसँग ५४० मतले पछि परे । गिरीले १७ हजार १७३ मत ल्याएर विजयी हुँदा एमालेका थापाले १६ हजार ६३३ मत पाएका छन् ।
आयोगको अन्तिम मत परिणाम अनुसार अछाम क्षेत्र नम्बर १ मा कांग्रेसका भरतबहादुर स्वारले पूर्व उपप्रधानमन्त्री समेत रहेका भीम रावललाई ५२६ मतको अन्तरमा हराए । स्वारले १० हजार ७ सय ५९ मत ल्याउँदा रावलले १० हजार २ सय ३३ मत प्राप्त गरे ।
यस्तै,डोटी क्षेत्र नम्बर १ मा एमालेका विद्यार्थी संगठन अनेरास्ववियुको नेतृत्व गरिरहेका दीपकबहादुर धामी सानो मतान्तरले पराजित हुन पुगे । उनी कांग्रेसका भरतबहादुर खड्कासँग ७८७ मतले पछि परे । खड्काले १४ हजार ८९७ र धामीले १४ हजार ११० मत लिए ।
