स्वास्थ्य तथा खाद्य स्वच्छता मन्त्रालयले कान्ति बाल अस्पतालका निर्देशक डा पंकज रायलाई जिम्मेवारीबाट हटाएको छ ।
रायलाई मंगलबारको मन्त्रीस्तरीय निर्णयमार्फत निर्देशकको जिम्मेवारीबाट हटाएर सोही अस्पतालका ११औँ तहका बालरोग विशेषज्ञ डा रामहरी चापागाईंलाई निर्देशकमा नियुक्त गरेको मन्त्रालयले जनाएको छ । सरकारी अस्पतालको नेतृत्वदायी जिम्मेवारीमा रहेकै अवस्थामा ह्याम्स अस्पतालमा समेत काम गरेको भन्दै मन्त्रालयले उनलाई निर्देशकको जिम्मेवारीबाट हटाएको जनाएको छ । निर्देशकको जिम्मेवारीबाट हटाइए पनि उनको दरबन्दी कान्ति बाल अस्पतालमै रहेकाले उनी सोही अस्पतालमा कार्यरत रहनेछन्।

बिज्ञापन

डा राय कार्यालय समयमा समेत ह्याम्स अस्पतालमा काम गरिरहेको समाचार सार्वजनिक भएसँगै स्वास्थ्य तथा खाद्य स्वच्छता मन्त्री निशा मेहताले डा रायसँग लिखित स्पष्टीकरण माग गरेकी थिइन्। मन्त्रीस्तरीय निर्णय उलंघन गर्दै निजीमा काम गरेको सार्वजनिक भएपछि मन्त्री मेहताले गत साता स्पष्टीकरण सोधेकी थिइन । स्वास्थ्य मन्त्रालयले गरेको निर्णय अनुसार सरकारी अस्पतालको नेतृत्वमा रहेका चिकित्सक निजी अस्पतालमा काम गर्न पाउँदैनन्।