संष्कृति पर्यटन तथा नागरिक उड्डयन मन्त्री पछिल्ला गतिविधिका कारण आलोचित छन् ।
बिज्ञापन
पर्यटनमन्त्री पौडेलले केही दिन अगाडि मनत्रीलाई भेट्दा मोवाइल फोन लैजान नपाइने नियम बनाए । मन्त्रालय वा अन्य स्थानमा भएका भेटघाटका क्रममा खिचिएका तस्बिरहरू प्रयोग गरी केही व्यक्तिहरूले मन्त्रीसँग आफ्नो विशेष सम्बन्ध रहेको दाबी गर्दै विभिन्न सर्वसाधारण तथा सरकारी निकायहरूबाट अनधिकृत लाभ लिन प्रयास भएको भन्दै उनले यस प्रकारको आग्रह गरेका थिए । यस्ता गतिविधिलाई नियन्त्रणमा लिन र मन्त्रालयको कार्यसम्पादनलाई थप व्यवस्थित, मर्यादित तथा पारदर्शी बनाउन आजैदेखि लागू हुने गरी कार्यकक्षभित्र मोबाइल फोनलगायत विद्युतीय उपकरण लैजान प्रतिबन्ध लगाइएको मन्त्री पौडेलले स्पष्ट पारेका छन्।
बिज्ञापन
तर तत्कालीन समयमा उद्योगमन्त्री दामोदर भण्डारीले समेत यसैगरी मोवाइल फोन लैजान निषेध लगाएका थिए । तत्कालीन समयमा मन्त्रीहरुको अडियो काण्ड छरपष्ट भएसँगै उद्योग, वाणिज्य तथा आपूर्ति मन्त्रीको कार्यकक्ष बाहिर सूचना टाँसेर मोवाइल फोन लकरमा राखेरमात्र भित्र प्रवेश गर्न भनिएको थियो । उच्च पदस्थलाई भेट्न जाँदा मोबाइल बाहिरै छोड्नुपर्ने अभ्यास नभए पनि सो समयका उद्योगमन्त्रीले यस प्रकारको शुरुवात गरेका थिए ।
यस्तै मन्त्रालयले जारी गरेको सूचनाअनुसार भेटघाटका लागि इच्छुकले कम्तीमा एक दिनअघि मन्त्रालयको वेबसाइटमा राखिएको गुगल फर्म भरेर आफ्नो विवरण दर्ता गर्नुपर्नेछ। दर्ता नगरी अचानक मन्त्रीसँग भेट गर्न आउने व्यवस्था अब मान्य नहुने जनाइएको छ। भेटघाटका लागि दैनिक समय दिउँसो ३ बजेदेखि ४ बजेसम्म मात्र तोकिएको छ। मन्त्रालयले सो समयसीमाभित्र मात्र सेवाग्राहीसँग भेटघाट गरिने स्पष्ट पारेको छ। अनलाइन फाराममा भेट्न चाहने व्यक्तिले आफ्नो नाम, ठेगाना, पद वा कार्यरत निकाय, सम्पर्क नम्बर तथा भेटको उद्देश्य उल्लेख गर्नुपर्नेछ। साथै भेट गर्न चाहेको विषय र मिति पनि अनिवार्य रूपमा खुलाउनुपर्ने व्यवस्था गरिएको छ।
बिज्ञापन
मन्त्रालयका अनुसार अधिकांश भेटघाट संस्कृति, पर्यटन र नागरिक उड्डयन क्षेत्रसँग सम्बन्धित विषयमा केन्द्रित रहनेछन्। तर अन्य कुनै विषयमा पनि भेट गर्न चाहनेले फाराममा ‘अन्य’ शीर्षकमा आफ्नो उद्देश्य उल्लेख गर्न सक्नेछन्। केही दिनदेखि मन्त्री पौडेललाई भेट्नका लागि मन्त्रालयको वेबसाइटमा रहेको गुगल फर्म भरेर नाम दर्ता गर्नुपर्ने व्यवस्था गरिएको,मन्त्रीलाई भेट्नका लागि अनलाइनबाट नाम दर्ता गर्नुपर्ने व्यवस्थाका बिषयमा समेत अनेकन टिका टिप्पणी भइरहँदा मन्त्री पौडेलले आफूलाई प्रलोभनमा पार्न नसकेपछि विवादमा तान्ने पुरानो चलन चलाइएको भन्दै स्पष्टीकरण दिएका छन् । उनले अन्य माध्यमबाट भेटघाट गर्न सकिने उल्लेख गर्दै अनलाइन माध्यमबाट समेत समय लिन सकिने व्यवस्था गरिएको भन्दै प्रष्टाएका छन् । मन्त्रालयका अधिकारीहरूले नयाँ प्रणाली लागू भएपछि मन्त्रीको समय व्यवस्थापन सहज हुने र सेवाग्राहीसँगको भेटघाटलाई थप व्यवस्थित बनाउन मद्दत पुग्ने अपेक्षा व्यक्त गरेका छन्।
