वीरगञ्ज महानगरपालिका–१० आदर्शनगरस्थित एक घरमा सञ्चालन भइरहेको अवैध गोदाममा छापा मार्न पुगेको संयुक्त सुरक्षा टोलीमाथि तस्कर समूहले आक्रमण गरेको छ । आक्रमणमा तीन जना सशस्त्र प्रहरी घाइते भएका छन् ।
बिज्ञापन
सोमबार बिहान सशस्त्र प्रहरी बल नेपाल नं. १३ गण पर्सा, सीमा सुरक्षा गुल्म वीरगञ्ज र वीरगञ्ज भन्सार कार्यालयको संयुक्त टोलीले रुन्चे नामले परिचित मदन प्रसाद गुप्ताको घरमा अवैध रूपमा भण्डारण गरिएको कपडा बरामद गर्ने क्रममा झडप भएको हो ।
बिज्ञापन
सशस्त्र प्रहरीका सहप्रवक्ता शैलेन्द्र थापाका अनुसार गोदामबाट करिब ७ लाख रुपैयाँ बराबरको अवैध कपडा नियन्त्रणमा लिएपछि तस्कर समूह आक्रमणमा उत्रिएको थियो । तस्करहरूले ढुंगामुढा गर्दा सुरक्षाकर्मी घाइते हुनुका साथै सशस्त्र प्रहरी बलका एउटा वानटन र एउटा स्कार्पियो गाडीमा समेत क्षति पुगेको छ ।
घाइते सशस्त्र प्रहरीको अवस्था सामान्य रहेको र घटनामा संलग्न व्यक्तिहरूको पहिचान तथा खोजी कार्य तीव्र बनाइएको सशस्त्र प्रहरीले जनाएको छ । बरामद गरिएको कपडा आवश्यक कानुनी प्रक्रिया पूरा गरी भन्सार कार्यालय बुझाइएको छ ।सीमावर्ती क्षेत्रमा अवैध कारोबारविरुद्ध निगरानी अझ कडा बनाइने सशस्त्र प्रहरी बलले स्पष्ट पारेको छ ।
बिज्ञापन
