एक महिनादेखि पूर्णरूपमा अवरुद्ध बनेको बाह्रबिसे–कोदारी सडकखण्ड आइतबारबाट सञ्चालन योग्य ट्र्याक खुलेको छ। पाँच स्थानमा खसेका पहिरो पन्छाएसँगै चीनसँग जोडिएको नेपालकै महत्वपूर्ण नाका तातोपानीसम्मको बाटो अब पुनः खुल्ने सम्भावना बनेको हो।
बिज्ञापन
बिज्ञापन
सडक डिभिजन कार्यालय चरिकोटका प्रमुख नारायणदत्त भण्डारीका अनुसार अहिले सबै पहिरो हटाइसकिएको छ। सोमबारबाट ग्राभेल सुरु हुने र त्यसपछि मात्र सवारी साधन सञ्चालनमा ल्याइने उनले जानकारी दिए।
बिज्ञापन
भण्डारीका अनुसार डाक्लाङ क्षेत्रमा तीन, घट्टेखोलामा एक र कोदारी खण्डमा एक गरी जम्मा पाँच ठाउँमा पहिरो खसेको थियो। यी पहिरो हटाउन कार्यालयले तीन एस्काभेटर, तीन लोडर, १३ टिपर र ४० जना मजदुरसहितको ठूलो जनशक्ति परिचालन गरेको थियो। इलेक्ट्रो हाइड्रोले समेत सहयोग गरेको उनले बताए।
यसअघि सडक डिभिजनले बीच–बीचमा बाटो खुलाउने प्रयास गरे पनि पानी पर्नासाथ लेदो–ढुंगा मिश्रित पहिरो झर्ने क्रम रोकिएन। भदौ ८ गतेदेखि बाटो पूर्णरूपमा बन्द हुँदा स्थानीय बासिन्दासँगै चीन–नेपाल व्यापारसमेत प्रभावित भएको थियो।
स्थानीयहरूले दीर्घकालीन समाधानबिना पहिरो पन्छाउने काम नगर्न चेतावनी दिएपछि केही समय काम रोकिएको थियो। करिब दुई सय घरधुरी माथिको पहिरोका कारण जोखिममा परेका थिए।
यस्तै, अन्तरिम चुनावी सरकारले भौतिक पूर्वाधार तथा यातायात मन्त्रालयको जिम्मेवारी सम्हालेका कुलमान घिसिङले सरोकारवालासँग बैठक गरी कामलाई तीव्र बनाउन निर्देशन दिएका थिए। असोज ३ गते तातोपानी भन्सारमा बसेको सर्वपक्षीय बैठकमा स्थानीयको माग सम्बोधन गर्ने र भविष्यमा दीर्घकालीन समाधानका लागि ठेक्का प्रक्रियामा जाने सहमति भएको थियो।
सो सहमति अनुसार चरिकोट सडक डिभिजनले सात दिनभित्र ट्र्याक खोल्ने लक्ष्यसहित काम अघि बढाएको हो। अब ग्राभेल सकिएलगत्तै सवारी सञ्चालन सुरु हुने बताइएको छ।
