पछिल्लो समय सुन तस्करीको हब बन्दै गएको छ,रसुवा जिल्ला । यही जिल्लाका एक जना भन्सार अधिकृत समेत सुन तस्करी प्रकरणमा मुछिएका छन् । सुन तस्करी जाँचबुझ आयोगले सुन तस्कर विदेशी नागरिकसँग घुस डिल गर्ने ती अधिकृत उपर कारवाहीका लागि सिफारिस गरिएको छ । सरकारले गठन गरेको सुन तस्करी नियन्त्रण जाँचबुझ आयोगले सुन तस्करीका नाइके मानिएका दावासँग रसुवा भन्सार अधिकृतको अस्वाभाविक उठबस रहेको र घुसको डिल भएको प्रमाणसमेत भेटिएपछि उक्त समितिले ती अधिकृतलाई कारवाही गर्न सिफारिस गरेको छ ।

बिज्ञापन

सरकारले पूर्व न्यायाधीश डिल्लीराज आचार्यको अध्यक्षतामा आयोग गठन गरेको थियो । झण्डै ५ महिना लामो अध्ययन र अनुसन्धान पछि उक्त समितिले सरकारलाई बुझाएको प्रतिवेदनले अहिले हलचल ल्याइरहेको छ ।  ४७० पृष्ट भन्दा लामो प्रतिवेदन बनाएर गृहमन्त्री रवि लामिछानेलाई बुझाएसँगै यो प्रकरणमा जोडिएका केन्द्रीय अनुसन्धान ब्युरो (सीआईबी) प्रमुख किरण बज्राचार्यलाई प्रहरी हेर्डक्वार्टरमा तानिएको छ । यस्तै अनुसन्धानकर्ता एसपी सञ्जयसिंह थापा, डीएसपीसहित नेपाल प्रहरीका ४ जना, अध्यागमन विभागका पूर्वमहानिर्देशक झलकराम अधिकारी, जिल्ला सरकारी वकिल कार्यालय काठमाडौंका २ जना सरकारी वकिल जनक घिमिरे र वासुदेव शर्मालाई विभागीय कारबाहीको सिफारिस गरेको छ । त्यसैगरी त्रिभुवन विमानस्थल भन्सारका तत्कालीन प्रमुख अरुण पौडेल, उपसचिव श्रीधर टण्डन र मुक्ति श्रेष्ठलाई पनि विभागीय कारबाहीको सिफारिस गरिएको हो ।