बालेन्द्र शाह नेतृत्वको सरकार बनेसँगै कर्मचारीहरुको कार्यशैली फेरिएको चर्चा र परिचर्चा चलिरहँदा कतिपय मन्त्रालय र विभागका कर्मचारीहरु पुरानै अवस्थामा फर्किएको गुनासो सुनिन थालेको छ । बालेन सरकार आउनेबित्तिकै कार्यालय समय ९ बजे शुरु हुने र ५ बजे सकिने नियम बन्यो । सातामा दुई दिन बिदा दिन थालियो । तर कर्मचारीहरु फेरि समयमा कार्यालय नपुग्ने र छिट्टै कार्यालयबाट निस्कन थालेको एक अध्ययनले देखाएको छ । प्रधानमन्त्री कार्यालय मातहतको राष्ट्रिय सतर्कता केन्द्रले गरेका एक रिर्पोट अनुसार, अर्थ र गृहका कर्मचारीहरुले समय पालाना नगरेको देखिएको हो । गृहका २३ र अर्थ मन्त्रालयका २७ कर्मचारी समयमा कार्यालयमा नपुगेको सो रिर्पोटमा उल्लेख छ । यस्तै ऊर्जा, जलस्रोत तथा सिंचाई मन्त्रालयका ४१ कर्मचारी ‘बङ्क’ हानेका पाइएको छ । केन्द्रका अनुसार, सूचना तथा सञ्चार मन्त्रालयका १३ र युवा, श्रम तथा रोजगार मन्त्रालयका १४ जना कर्मचारी केन्द्रको छड्केमा परेका हुन ।

बिज्ञापन

नयाँ सरकार गठन भएको सुरुवाती दिनहरूमा सेवा प्रवाहमा जुन गति र तत्परता देखिएको थियो, त्यो अहिले लगभग पूर्णतः ओझेलमा परिसकेको छ । शुरु शुरुमा कर्मचारीमा केही डर थियो । अहिले सबै सत्ता सञ्चालक उही हुन् भन्ने कर्मचारीमा परिसकेको छ । केन्द्रले गरेको अनुगमनको क्रममा गोरखापत्रका २९ कर्मचारी छड्केमा परेका छन् । यस्तै श्रम तथा व्यवसायजन्य सुरक्षा विभागका ७ कर्मचारी, राष्ट्रिय निकुञ्ज तथा वन्यजन्तु संरक्षण विभागका ५ कर्मचारी छड्केमा परेका हुन । यता,भन्सार विभागका ३, कम्पनी रजिष्ट्रारको कार्यालयका ४ कर्मचारी कर्मचारीलाई कारवाहीको सिफारिस गरिएको छ । जानकारहरुका अनुसार, कम्पनी रजिष्ट्रारको कार्यालय, उद्योग विभाग, वन विभाग तथा वन मन्त्रालय, कर कार्यालय सबैतिर कर्मचारीले आफ्नै पुरानो प्रवृत्ति देखाउन थालेका छन् । ती कार्यालयमा फाइल अड्काउने,झुलाउने प्रवृत्ति पुनराबृत्ति भएको सेवाग्राही तथा व्यवसायीहरुले गुनासो गरेका छन् ।