संघीय सरकारले सातामा दुई दिन सार्वजनिक बिदा दिने र कार्यालय समय बिहान ९ देखि ५ बजेसम्म कायम गरेको भए पनि ताप्लेजुङको आठराई त्रिवेणी गाउँपालिकाले भने उक्त निर्णय कार्यान्वयन नगर्ने घोषणा गरेको छ । संघीय सरकारले यही चैत २३ गतेबाट लागू हुनेगरी हप्तामा दुई दिन बिदा दिने निर्णय गरे पनि पालिकाले त्यो निर्णय कार्यान्वयन नगर्ने भएको हो । सरकारको निर्णयलाई केही दिन अभ्यास गरेर हेर्दा समेत प्रभावकारी नदेखिएपछि कार्यपालिकाले पुरानै १० देखि ५ बजेको समयलाई निरन्तरता दिने निर्णय लिएको हो।
बिज्ञापन
सघीय सरकारले गरेको यो निर्णय व्यवहारिक नभएको भन्दै स्थानीय तहले नमान्ने निर्णय गरेको हो । पालिकाले अधिकांश कर्मचारी कार्यालय आसपास नै बस्ने गरेको र भौगोलिक विकटताका कारण उक्त थप भएको कार्यालय समयभित्र सेवाग्राहीहरूसमेत कार्यालयसम्म पुग्न असमर्थ हुने देखिएकाले निर्णय कार्यान्वयन नहुने जनाएको हो । गाउँपालिकाको ६०औं कार्यपालिका बैठकले संघीय सरकारको यो नीति स्थानीय स्तरमा अव्यवहारिक रहेको ठहर गर्दै साविककै व्यवस्थाअनुसार कार्यालय र विद्यालय सञ्चालन गर्ने निर्णय गरेको हो । निगुरादिन, चाँगेदेखिको सेवाग्राही खाना खाएर पालिकासम्म आइपुग्दा ११ /१२ बज्छ,कर्मचारीले पनि दुई घण्टा हिँडेर आउनुपर्ने हुँदा केन्द्रका निर्णय स्थानीय तहलाई अमान्य हुने बताइएको छ । पालिकाका अनुसार चालु आर्थिक बर्षको मुख्य काम गर्ने समय यही भएको कारण संघीय सरकारको कार्यालय समय परिवर्तनको निर्णय लागु गर्न नसकिने जनाइएको छ ।
बिज्ञापन
पालिकाले सूचना जारी गर्दै सबै सरकार कार्यालयहरूमा आइतबारदेखि शुक्रवारसम्म सञ्चालन हुने गरी वैशाख १ गतेदेखि कात्तिक १५ गतेसम्म बिहान १० देखि अपराह्न ५ बजे र कात्तिक १६ गतेदेखि माघ १५ सम्म १० देखि अपराह्न ४ बजेसम्म सञ्चालन हुने जनाएको छ ।
यस्तै पालिकाले विद्यालयमा पनि शनिबार मात्रै बिदा हुने उल्लेख गरेको छ । पाठ्यक्रम विकास केन्द्रले २२० दिनको कोर्ष डिजाइन गरेको छ । पढाइ हुने दिन भने १ सय ९० दिन मात्रै हुने र स्थानीयस्तरमा हुने सबै खालका बिदा र परीक्षासमेतको समय कटाएर ८६ दिनमात्रै पढाइ हुने देखिँदा शिक्षा क्षेत्रमा समेत दुई दिने निर्णय व्यवहारिक नहुने ठहर गरेको छ ।
बिज्ञापन
