सरकारले राजनीतिक कोटामा नियुक्त भएका ६ देशका राजदूतलाई फिर्ता बोलाउने तयारी गरेको छ । जेनजी विद्रोह पछि बनेको चुनावी सरकारले राजनीतिक कोटाबाट नियुक्त भएका विभिन्न ११ देशका राजदूतहरु फिर्ता बोलाइएको भए ६ देशका राजदूतहरुलाई जिम्मेवारीमै राखेको थियो । यसरी राजनीतिक कोटाबाट नियुक्त भएका बाँकी ६ देशका राजदूत फिर्ता बोलाउने तयारी गरिएको हो ।
बिज्ञापन
हाल राजनीतिक कोटाबाट भारत, अस्ट्रेलिया, डेनमार्क, दक्षिण कोरिया, दक्षिण अफ्रिका र श्रीलंकामा राजदूतहरु कार्यरत छन् । अघिल्लो सरकारले फिर्ता नबोलाएका राजदूतहरुमध्ये चित्रलेखा यादव,डा शंकर शर्मा, सुम्निमा तुलाधार, शिवमाया तुम्बाहाङ्फे, कपिलमान श्रेष्ठ र पूर्णबहादुर नेपालीलाई ती देशबाट फिर्ता बोलाउन लागिएको हो ।
अघिल्लो सरकारले गत असोज ३० गते एकसाथ ११ देशमा कार्यरत नेपाली राजदूतलाई फिर्ता बोलाएको थियो । जसमा चीनबाट कृष्णप्रसाद ओली, जर्मनीका राजदूत रहेका शैल रुपाखेती,जापानबाट दुर्गाबहादुर सुवेदी अर्थात दुबसु, धनप्रसाद पण्डितलाई इजरायल, नेत्रप्रसाद तिम्सिनालाई मलेसियाबाट फिर्ता बोलाइएको थियो । यस्तै, रमेशचन्द्र पौडेललाई कतार, जंगबहादुर चौहान रुसबाट फिर्ता बोलाइएको थियो भने डा नरेशविक्रम ढकाल (साउदी अरेबिया), चन्द्रकुमार घिमिरे (बेलायत), लोकदर्शन रेग्मीलाई अमेरिका र शनिल नेपाललाई स्पेनबाट फिर्ता बोलाइएको थियो । यसरी फिर्ता बोलाइएका मध्ये तीन जना अझैं परराष्ट्रमा हाजिरी गर्दै आएका छन् ।
बिज्ञापन
नेपालका विभिन्न देशमा ३४ दूतावास तथा स्थायी नियोग छन् । जसमध्ये ५० प्रतिशत परराष्ट्र मन्त्रालयका सहसचिव र बाँकी ५० प्रतिशत हिस्सामा राजनीतिक कोटामा सरकारमा सहभागी राजनीतिक दलले सिफारिस गरेका व्यक्तिलाई समेटिने गरिन्छ ।
बिज्ञापन
