रसुवा । नेकपा (एमाले) का अध्यक्ष केपी शर्मा ओली को पक्राउको विरोधमा रसुवामा एमाले कार्यकर्ताले प्रदर्शन गरेका छन्।
रसुवाको कालिका गाउँपालिका अन्तर्गत कालिकास्थान क्षेत्रमा एमाले निकट कार्यकर्ताले नाराबाजीसहित विरोध प्रदर्शन गरेका हुन्। प्रदर्शनका क्रममा उनीहरूले गृहमन्त्री सुधन गुरुङ को राजीनामासमेत माग गरेका छन्।
बिज्ञापन
प्रदर्शनमा सहभागी कार्यकर्ताले अध्यक्ष ओलीको पक्राउलाई अन्यायपूर्ण, गैरकानुनी र राजनीतिक प्रतिशोधबाट प्रेरित कदम भएको आरोप लगाएका थिए। उनीहरूले तत्काल रिहाइको माग गर्दै सरकारविरुद्ध चर्का नाराबाजी गरेका थिए।
बिज्ञापन
रसुवा युवा संघका अध्यक्ष सुरेश थोक्राले गृहमन्त्रीको राजीनामा नआउँदासम्म आन्दोलन जारी रहने बताएका छन्। उनका अनुसार अध्यक्ष ओलीमाथि गरिएको पक्राउ लोकतन्त्र माथिको प्रहार, विधिको शासनविरुद्धको खुला हस्तक्षेप र राजनीतिक प्रतिशोधको चरम नमूना हो।
“यस निरंकुश, अन्यायपूर्ण र दमनकारी कदमप्रति हाम्रो संगठनको घोर आपत्ति र कडा निन्दा छ,” उनले भने, “अध्यक्ष ओलीलाई तत्काल रिहा नगरेसम्म विरोध कार्यक्रमलाई थप सशक्त बनाइनेछ।”
राष्ट्रिय युवा संघ नेपाल जिल्ला कमिटी रसुवाको आयोजनामा कालिकास्थानमा उक्त विरोध कार्यक्रम गरिएको बताइएको छ। प्रदर्शनका क्रममा कार्यकर्ताले सरकारविरुद्ध नाराबाजी गर्दै आन्दोलन जारी राख्ने चेतावनी दिएका छन्।
बिज्ञापन
