काठमाडौं — नेपाल टेलिकमको बिलिङ प्रणालीसम्बन्धी ठेक्कामा व्यापक अनियमितता भएको भन्दै अख्तियार दुरुपयोग अनुसन्धान आयोगले प्रबन्ध निर्देशक संगीता पहाडीसहित १८ जनाविरुद्ध विशेष अदालतमा भ्रष्टाचार मुद्दा दायर गरेको छ।
बिज्ञापन
आयोगले आइतबार विशेष अदालतमा दायर गरेको आरोपपत्रमा हाल निलम्बनमा रहेका पूर्व प्रबन्ध निर्देशक सुनिल पौडेलसमेतलाई प्रतिवादी बनाइएको छ। भ्रष्टाचार र अकुत सम्पत्तिको आरोपमा मुछिएपछि पौडेल निलम्बनमा परेका थिए। त्यसपछि २०८१ साल भदौमा सरकारले संगीता पहाडीलाई टेलिकमको प्रबन्ध निर्देशक नियुक्त गरेको थियो।
बिज्ञापन
बिलिङ प्रणालीको ठेक्का प्रक्रिया र कार्यान्वयनका क्रममा ठेक्का सम्झौता, सेवा कार्यान्वयन, मूल्यांकन तथा भुक्तानीसम्बन्धी चरणहरूमा भ्रष्टाचार भएको आयोगको ठहर छ।
आयोगले आरोपपत्रमा ३३ करोड ४८ लाख रुपैयाँ बराबरको बिगो दाबी गरेको छ। उक्त बिगोअनुसार कैद र जरिवाना सजाय माग गर्दै, बिलिङ प्रकरणबाट मात्रै ९ करोड ८८ लाख रुपैयाँ बराबरको हानि–नोक्सानी भएको उल्लेख छ। आयोगले त्यो रकम असुल गर्न पनि अदालतसमक्ष माग राखेको छ।
बिज्ञापन
टेलिकमजस्तो ठूला आम्दानी गर्ने सार्वजनिक संस्थामा भएको भनिएको यस प्रकारको भ्रष्टाचारको प्रकरणले सार्वजनिक निकायमा पारदर्शिता र जवाफदेहितामाथि गम्भीर प्रश्न उठाएको छ।
