लाहुरेभन्दा गुण्टाको फुर्फुर धेरै छ,सिंहदरबारतिर । गृहमन्त्री रमेश लेखक र सचिव गोकर्णमणि दुवाडी भन्दा पावरफुल छन्,त्यहाँका स्वकीय र पिए ।
मन्त्री रमेश लेखकले आफ्नो भेगीय र तुलनात्मक रुपमा इमान्दार र क्षमतावान धर्मराज जोशीलाई सचिवालयमा राखेका थिए तर उनलाई अध्यागमनमा फालेर त्यहाँ अहिले बद्री तिवारी आइपुगेका छन् । उनै तिवारी कर्मचारी र प्रहरी प्रशासनको सरुवामा हावी हुन थालेका छन् ।
बिज्ञापन
तिवारी यस अघि दिल्ली दुतावासमा थिए । डिभिजन सहकारी कार्यालय ललितपुर,यस अघि रमेश लेखक मन्त्री हुँदा उनकै सचिवालयमा बसेका कर्मचारी हुन । शेरबहादुर प्रम हुँदा उनकै सचिवालयमा बसेका उनी यस पटक मन्त्री लेखकलाई निगरानी गर्ने खटाइएको बताइन्छ ।
बिज्ञापन
उसो त अहिले गृह प्रशासनमा पर्वतेहरु हाबी छन् । मन्त्रीको निजी सचिव तिवारी,कर्मचारी प्रशासनका हाकिम छवि रिजालदेखि ललितपुरको प्रमुख जिल्ला अधिकारी बनाएर खटाइएका रमेश ढकाल समेत पर्वते हुन । ढकाल सहसचिव भएको दुई बर्ष मात्र भयो । तिवारी सचिवालयमा आए लगतै अध्यागमनमा ४० जना अधिकृतहरु खटाइएको छ । जबकी त्यहाँ ९ जना अधिकृतको दरबन्दीमात्र रिक्त हो । त्यसरी अधिकृत खटाइँदा अधिकाश पर्वतकाले अवसर पाएका छन् ।
कर्मचारी सरुवा गरिँदा प्रचलित ऐन कानुन विपरित सरुवा गरिएको गुनासो चुलिएको छ । यस अघि ललितपुर महानगरको प्रमुख प्रशासकीय अधिकृत चलाएका गणेश अर्याललाई रुपन्देहीबाट वीरगञ्ज लगियो । एमाले निकट रहेका वासुदेव घिमिरेलाई पोखराबाट तानेर केही समय गृहको बरण्डामा राखेर अहिले रुपन्देही लगिएको छ ।
लालबाबु कवारीलाई आफ्नै गृह जिल्ला महोत्तरीको प्रमुख जिल्ला अधिकारी बनाएर खटाइएको छ । सहसचिव बसन्त अधिकारीलाई चलखेलका आधारमा वारा पठाइएको छ भने सहसचिव भएको दुई बर्षमै रमेश ढकाल ललितपुरमा पठाइएको छ ।
गृहका सदाबाहार सिडियोका रुपमा चिनिएका उमेश ढकाल काभ्रे पुगेका छन् । जति सिडियो भएका छन्,आर्थिक चलखेलकै आधारमा भएका हुन अर्काे सहसचिव भन्छन् । पूराना र योग्य कर्मचारीले जिम्मेवारी पाएका छैनन् । जस्तो चितवनबाट इन्द्रदेव यादवलाई अहिले गृहको बरण्डामा राखिएको छ । यादव गृह प्रशासनको काविल अफिसर मानिन्छन् । अर्काे काविल सहसचिव भीष्म भुसाल सिडियो बन्ने चाहना राखे,अनेकौं पटक अनुरोध गरे तर विपद् प्राधिकरणमा थन्काइएको छ ।
बिज्ञापन
रामबन्धु सुवेदी,रोशनीकुमारी श्रेष्ठ,तुलसीबहादुर श्रेष्ठ,शशिधर घिमिर लगायतका काविल सहसचिवलाई बरण्डामा थन्काएर सहसचिवको दरबन्दी रहेको डोटी,बैतडी,डडेल्धुरा,अछाम,जुम्ला,दैलेख,सल्यान,प्यूठान,अर्घाखाँची,रामेछापमा उपसचिवलाई पठाइएको छ । सरुवा मापदण्डमा आफ्नै गृहजिल्लाको नेतृत्व दिएर कर्मचारी नपठाउने भनिएको छ तर नवराज जैसीलाई गृहजिल्ला दैलेख, लालबाबु कवारीलाई महोत्तरी र रामकृष्ण अधिकारीलाई गृहजिल्ला नुवाकोटमै खटाइएको छ ।
