चालु आर्थिक बर्ष शुरु भए यताका पछिल्लो तीन महिनामा तीन सचिवले पदबाट राजीनामा दिएका छन् । कसैको जागिर अवधि अढाइ बर्ष त केहीको चार महिना अवधि बाँकी हुँदै पदबाट राजीनामा दिएका हुन ।
यसरी राजीनामा दिनेका बीचमा थपिएका छन्,राष्ट्रिय सभाका सचिव सुरेन्द्र अर्याल । गत ८० साल वैशाख २१ गते राष्ट्रिय सभाको सचिवमा नियुक्त भएका अर्यालले मंगलबारदेखि लागू हुनेगरी पदबाट राजीनामा दिएका हुन् ।
बिज्ञापन
पाँच बर्ष कार्यकालका लागि नियुक्ति पाएका अर्यालले साढे दुई बर्षमै पदबाट राजीनामा दिएका हुन । अर्यालले दिएको राजीनामा पत्र राष्ट्रपति कार्यालय पुगिसकेको छ ।
यस अघि राष्ट्रिय सभाकै सहसचिव रहेका अर्याल बढुवा हुँदै राष्ट्रिय सभाका सचिवमा नियुक्त भएका थिए । तर जिम्मेवारी पाएको अढाइ बर्षमै उनले पदबाट राजीनामा दिएका हुन ।
बिज्ञापन
राष्ट्रपति कार्यालयले एक विज्ञप्तिमार्फत ‘संघीय संसदका महासचिव, प्रतिनिधिसभाका सचिव तथा राष्ट्रियसभाका सचिवको पारिश्रमिक, सेवाको सर्त र सुविधासम्बन्धी ऐन, २०७५ को दफा ६ को खण्ड (क) बमोजिम’ कात्तिक ११ गतेदेखि लागू हुनेगरी स्वीकृत हुन आफ्नो पदबाट राजीनामा दिएको जानकारी गराएको छ ।
चालु आर्थिक बर्ष लागे यता अर्याल सहितका तीन सचिवहरुले राजीनामा दिइसकेका छन् । यस अघि नायब महान्यायाधिवक्ता डा टेकराज घिमिरे र सचिव भरतमणि सुवेदीले राजीनामा दिएका थिए । साउन ५ गते अनिवार्य अवकाशमा गएका घिमिरेले साउन २ गते राजीनामा दिएका थिए । उनको राजीनामा साउन ४ गते बसेको मन्त्रिपरिषद् बैठकले स्वीकृत गरेको थियो । ।
बिज्ञापन
घिमिरेको राजीनामा स्वीकृत भएको एक महिना नपुग्दै उनले अर्को राजनीतिक नियुक्ति पाएका छन् । उनलाई भदौ २ गतेको मन्त्रिपरिषद्को बैठकले प्रशासकीय अदालतको अध्यक्षमा नियुक्त गरेको छ । घिमिरेले राजीनामा दिएर अर्को पदमा नियुक्त भएको एक सातामै अर्का सचिव सुवेदीले राजीनामा दिएका थिए । राष्ट्रिय प्राकृतिक स्रोत तथा वित्त आयोगका सचिव सुवेदीले पाँच वर्षे कार्यकाल सकेर अनिवार्य अवकाशमा जानुभन्दा ४ महिना अगाडि नै पदबाट राजीनामा दिए । भदौ ८ गते सचिव सुवेदीले दिएको राजीनामा भदौ ९ गते बसेको मन्त्रिपरिषद् बैठकले स्वीकृत भएको थियो । सचिव सुवेदी आगामी पुस २९ गते पाँच वर्षे कार्यकाल सकेर अनिवार्य अवकाशमा जाने थिए । त्यसको ४ महिना अगाडि नै उनी निजामती सेवाबाट बाहिरिएका हुन् ।
