आफ्नो सेवा सुविधा कटौती भएपछि आन्दोलित भएका कर्मचारीहरुले वोर्ड अध्यक्षको गाडीको चाबी नै खोसेका छन् । अघिल्लो महिनाको अन्तिम साता सचिवस्तरीय निर्णयबाट धितोपत्र बोर्डका कर्मचारीहरुको सेवा सुविधा कटौती गरिएको थियो । सो निर्णयसँगै आन्दोलित भएका कर्मचारीहरुले आज त्यहाँका अध्यक्ष सहित उच्च पदस्थ अधिकारीहरुको गाडीको चाबी खोसेका हुन ।
बिज्ञापन
अर्थ मन्त्रालयले गरेको सेवासुविधा कटौतीको निर्णयविरुद्ध नेपाल धितोपत्र बोर्डका कर्मचारीहरूले आन्दोलित भएका कर्मचारीहरुले अध्यक्ष लगायतका पदाधिकारीहरुको गाडीको चाबी खोसेका हुन ।
बिज्ञापन
गत ३१ भदौमा राजस्व सचिवस्तरीय निर्णय गर्दै बोर्डबाट सञ्चालित कर्मचारी कल्याण कोष र कर्मचारी सुरक्षण कोष नेपाल सरकार (कार्य विभाजन) नियमावली, २०७४ र नेपाल धितोपत्र बोर्ड कर्मचारी सेवा, शर्त सम्बन्धी नियमावली, २०६८ विपरित रहेको भन्दै तत्काल खारेज गर्नै निर्देशन दिइएको थियो । धितोपत्र सम्बन्धी ऐन, २०६३ को दफा २२, दफा ११६, विधायन ऐन, २०८१ को दफा १५, नेपाल सरकार (कार्य विभाजन) नियमावली, २०७४ र नेपाल धितोपत्र बोर्ड कर्मचारी सेवा, शर्त सम्बन्धी नियमावली, २०६८ को नियम १६७ विपरित जारी भएका नेपाल धितोपत्र बोर्ड कर्मचारी कल्याणकोष कार्यविधि, २०७१ र नेपाल धितोपत्र वोर्ड कर्मचारी सुरक्षण कोष (सञ्चालन तथा व्यवस्थापन) कार्यविधि, २०७५ तत्काल खारेज गर्न निर्देशन दिइएको थियो ।
सचिवस्तरीय निर्णयबाट बोर्डका कर्मचारीले खाइपाई आएको सुविधा र कर्जा सुविधा कटौती गर्ने निर्देशन दिएसँगै सो विरुद्ध कर्मचारीहरु आन्दोलित भएका हुन ।यसरी कर्मचारीको सेवा सुविधा र कर्जा सुविधा कटौती गर्ने निर्णय गरेका सचिव साता दिन पछि सरुवा भइसकेका छन् । अर्थमन्त्री रामेश्वर खनालले सचिव घिमिरेको सरुवा गरेर राष्ट्रिय प्राकृतिक स्रोत तथा वित्त आयोगमा पुर्याएका छन् ।
बिज्ञापन
बोर्डका कर्मचारीहरु भने उक्त निर्णय नसच्चिएसम्म काममा नफर्किने भन्दै तालाबन्दी र बोर्डमा नाराबाजी गरिरहेका छन् । उनीहरुले विगतमा मन्त्रिस्तरीय निर्णयबाट कार्यान्वनयमा आएको दुबै कार्यविधि सचिवस्तरी निर्णयबाट खारेज हुन नसक्ने भन्दै नेपाल सरकारको निर्णयबाट मात्रै खारेज हुनसक्ने दावी गरेका छन् ।
सो निर्णयका विरुद्धमा धितोपत्र बोर्डका अध्यक्ष सन्तोषनारायण श्रेष्ठविरुद्ध कर्मचारीहरुले नाराबाजी गरेका छन् । खुमलटास्थित बोर्डको कार्यालयमा अध्यक्ष श्रेष्ठविरुद्ध कर्मचारीले धर्नासहित विरोध गरिरहेका छन् । आन्दोलनमा उत्रिएका दल निकट कर्मचारीहरुले निर्णय सच्याउन वा राजीनामा दिन माग गरेका छन् । कर्मचारीले उच्च अधिकारीहरुको गाडी चाबी खोसेर राखेका छन् ।
