काठमाडौं । जेनजी आन्दोलनमा ध्वस्त भएका संरचना पुनर्निर्माण र आगामी फागुन २१ गते हुने प्रतिनिधिसभा निर्वाचनका लागि आवश्यक बजेट व्यवस्थापन गर्न अर्थ मन्त्रालयले कार्यदल गठन गरेको छ ।
बिज्ञापन
तीन सदस्यीय कार्यदलमा बजेट तथा कार्यक्रम महाशाखा प्रमुख सुमन दाहाल, वैदेशिक सहायता समन्वय महाशाखा प्रमुख धनीराम शर्मा र राजस्व व्यवस्थापन महाशाखा प्रमुख उत्तरकुमार खत्री सहभागी छन् । कार्यदललाई चालु बजेटभित्रकै प्राथमिकता फेरबदल गर्दै स्रोत जुटाउने सम्भावनाको अध्ययन गर्ने जिम्मेवारी दिइएको मन्त्रालयका प्रवक्ता टंकप्रसाद पाण्डेयले जानकारी दिए ।
बिज्ञापन
“चुनाव र पुनर्निर्माण दुवैका लागि ठूलो रकम आवश्यक पर्छ । नयाँ पूरक बजेट ल्याउनेभन्दा पनि हालकै बजेटभित्र टुक्रा–टुक्रा आयोजना कटौती गरेर स्रोत जुटाउने तयारी गरिएको छ,” पाण्डेयले बताए ।
भदौ ३० गते कार्यभार सम्हालेका नवनियुक्त अर्थमन्त्री रामेश्वरप्रसाद खनालले पनि यसअघि बजेटमा राजनीतिक दबाबका कारण परेका, पूर्वतयारी नसकिएका र टुक्रे कार्यक्रम हटाइने स्पष्ट संकेत दिएका थिए ।
बिज्ञापन
उनका अनुसार सरकारले पूरक बजेट ल्याउने योजना छैन । बरु, चालु बजेटमै रहेका कम प्राथमिकताका योजना कटौती गरी करिब एक खर्ब रुपैयाँ बराबरको स्रोत निर्वाचन र पुनर्निर्माणमा परिचालन गर्ने तयारी भइरहेको छ ।
