डिभिजन वन कार्यालय धनगढीका वरिष्ठ वन अधिकृत पूर्णशंकर यादव ७ लाख ३१ हजार रुपैयाँ घुस रकमसहित रंगेहात पक्राउ परेका छन्।
बिज्ञापन
अख्तियार दुरुपयोग अनुसन्धान आयोग, कञ्चनपुरबाट खटिएको टोलीले यादवलाई कार्यालयमै घुस लिँदै गरेको अवस्थामा नियन्त्रणमा लिएको हो।
बिज्ञापन
कैलालीको चुरे गाउँपालिका–६ स्थित ग्वासी सामुदायिक वनमा घाटगड्डी गरिएको काठको बिमर्का र छोडपुर्जी दिने क्रममा सेवाग्राहीसँग यादवले घुस मागेको उजुरी अख्तियारमा परेपछि आयोग सक्रिय भएको थियो। उजुरीको आधारमा निगरानी थालेको टोलीले सोमबार उनलाई सेवाग्राहीबाट रकम लिँदै गरेको अवस्थामा पक्राउ गरेको हो।
यादवमाथि यसअघि पनि कर्मचारी सरुवा बढुवा प्रक्रियामा राजनीतिक पहुँच प्रयोग गरी रकम संकलन गर्ने, सामुदायिक वनको छोडपुर्जी, कार्ययोजना र विधान नविकरणको नाममा अनियमित रकम उठाउने गरेको गुनासो बढ्दै आएको अख्तियार स्रोतले जनाएको छ।
बिज्ञापन
प्राप्त जानकारीअनुसार यादवसहित थप एक व्यक्ति घटनामा संलग्न रहेका छन्। ती व्यक्तिले एक लाख रुपैयाँ बुझेको र हाल फरार रहेको बताइएको छ।
घटनाबारे थप अनुसन्धान भइरहेको अख्तियारका प्रवक्ता राजेन्द्रकुमार पौडेलद्वारा जारी विज्ञप्तिमा उल्लेख गरिएको छ।
