राजस्व अनुसन्धान विभागले राजस्व चुहावट गरेको भन्दै ध्रुव कन्स्ट्रक्सनका सञ्चालक ध्रुव देवविरुद्ध उच्च अदालत पाटनमा मुद्दा दायर गरेको छ ।उक्त कम्पनीविरुद्ध मुख्यतः नक्कली बिलबिजक बनाएर भ्याट तथा आयकर छली गरेको अभियोग लगाइएको छ ।
बिज्ञापन
काठमाडौं महानगरपालिका‐३१ ठेगाना भएको उक्त कम्पनीले ठेक्कापट्टा, कन्सल्टेन्सी सेवा तथा कन्ट्रक्सन सामान खरिद बिक्री शीर्षकमा गरेको कारोबारका क्रममा राजस्व चुहावट सम्बन्धी कसुर गरिएको आरोप लगाइएको छ । विभागले चालु वर्षमा यति ठूलो रकम असुल गर्नुपर्ने मागसहित एउटै कम्पनीविरुद्ध अभियोग पत्र दर्ता गरेको सम्भवतः यो पहिलो मुद्दा हो ।
बिज्ञापन
विभागका सूचना अधिकारी नवराज अधिकारीका अनुसार अनुसन्धानका क्रममा वस्तु र सेवा हस्तान्तरण नगरी बिल जारी गरेको, खरिद कारोबार बैंकमार्फत नगरेको, बीजका सिलसिलेबार जारी नगरेको, मालसामान खरिदको स्रोत पुष्टि नभएको, मुल्य अभिवृद्धि र आयकर दाखिला नगरेकोलगायतका गल्ती भेटिएको थियो ।
यस्तै, मूल्य अभिवृद्धि कर तथा आयकर तर्फ झुट्टा विवरण पेश गरेको, मालसामान खरिदको स्रोत पुष्टि नभएको तथा नेपाल सरकारलाई नियमानुसार तिर्नु बुझाउनुपर्ने मूल्य अभिवृद्धि कर तथा आयकर लगायतका राजस्व नतिरी राजस्व चुहावट गरेको अभियोग लगाइएको छ।
बिज्ञापन
देवलाई मूल्य अभिवृद्धि करतर्फ ४५ करोड ८० लाख ८३ हजार ४३४ रुपैयाँ र आयकरतर्फ रू १४ करोड ६५ लाख ३१ हजार ८२४ रुपैयाँ गरी जम्मा रु. ६० करोड ४६ लाख १५ हजार २५८ रुपैयाँ बिगो कायम गरी बिगो असुल तथा बिगोको शतप्रतिशत जरिवाना गरी जम्मा १ अर्ब २० करोड ९२ लाख ३० हजार ५१६ रुपैयाँ असुलउपर गर्न तथा ऐनको दफा २३ को उपदफा (१) (घ) बमोजिम कैद सजायको मागदाबी लिई आज उच्च अदालत पाटनमा अभियोगपत्र दायर गरिएको छ ।
