अब अस्थायी करार कर्मचारीहरुलाई समेत सामाजिक सुरक्षा योजनामा सहभागी हुने भएका छन् । लामो समयदेखि अस्थायी र करार सेवाका कर्मचारीहरुले उठाउँदै आएको मागको सम्बोधन गर्दै सरकारले सरकारी निकायमा कार्यरत अस्थायी, करार कर्मचारी अब सामाजिक सुरक्षा योजनामा सहभागी गराउने भएको हो । यस सम्बन्धमा सरकारले गरेको निर्णय राजपत्रमा प्रकाशन भएसँगै अव अस्थायी,करार सेवाका कर्मचारीहरु सामाजिक सुरक्षामा आवद्ध हुने बाटो खुलेको हो ।
बिज्ञापन
। श्रम रोजगार तथा सामाजिक सुरक्षा मन्त्रालयका निमित्त सचिव डण्डुराज घिमिरेका अनुसार नयाँ वर्ष, २०८२ को पहिलो दिन राजपत्रमा सोसम्बन्धी सूचना प्रकाशित गरिएको छ । यस सम्बन्धी निर्णय गत चैत १५ मा भएको भए पनि नयाँ वर्षको पहिलो दिन राजपत्रमा सूचना प्रकाशित भएसँगै कार्यान्वयनमा गएको छ । यसबाट सरकारी निकायका कार्यरत अस्थायी, ज्यालादारी कर्मचारीले राहत पाउनेछन् ।
बिज्ञापन
जस अनुसार,सरकारी कोष, नेपाल सरकार, प्रदेश सरकार वा स्थानीय तहको पूर्ण वा आंशिक स्वामित्व भएका संस्थान, निगम, बोर्ड, प्राधिकरण, प्रतिष्ठानमा कार्यरतले सो योजनामा सहभागी हुन पाउने छन् । सामाजिक सुरक्षा कोषमा योगदानकर्ताका रुपमा सूचीकृत गरी त्यस्ता निकायमा कार्यरत कर्मचारीले खाइपाई आएको तलबको कम्तीमा ६० प्रतिशतलाई आधारभूत तलब मानेर सो योजनामा सहभागी हुन पाउने प्रबन्ध गरिएको छ । त्यसमा २० प्रतिशत रोजगारदाताले र ११ प्रतिशत योगदानकर्ताले जम्मा गर्नुपर्नेछ । सामाजिक सुरक्षा ऐन, २०७४ र सामाजिक सुरक्षा नियमावली, २०७५ बमोजिम उक्त निर्णय भएको राजपत्रमा प्रकाशित सूचनामा उल्लेख छ ।
हाल मुलुकभर करिब ४० हजारभन्दा बढी अस्थायी,करार सेवामा कर्मचारीहरु संघ, प्रदेश र स्थानीय तहमा कार्यरत रहेको अनुमान गरिएको छ ।
बिज्ञापन
