प्रधानमन्त्री राहत कोषमा १ अर्ब ५२ करोड मौजाद रहेको प्रधानमन्त्री कार्यालयले जनाएको छ । हिजो बसेको मन्त्रीपरिषद् बैठकले कोषमा एक अर्ब रुपैयाँ जम्मा गर्ने निर्णय गरेको थियो । मन्त्रिपरिषद्को सोमबार बसेको बैठकले विपद् जोखिम न्यूनीकरण तथा व्यवस्थापन ऐन २०७४ बमोजिम विपद् व्यवस्थापन कोषमा बाढीपहिरो प्रभावितको तत्काल राहत र उद्धारका लागि अर्थ मन्त्रालयले तत्काल एक अर्ब उपलब्ध गराउने निर्णय गरेको हो ।
बिज्ञापन
बाढी पहिरो पछि यो कोषमा रकम जम्मा हुन थालेको छ । राष्ट्रिय वाणिज्य बैंकले प्रधानमन्त्री दैवी प्रकोप उद्धार कोषमा दुई करोड रुपैयाँ जम्मा गरेको छ । बैंक सञ्चालक समितिका अध्यक्ष दिलिपकुमार ढुंगानाले आज सिंहदरबारस्थित प्रधानमन्त्री तथा मन्त्रिपरिषद्को कार्यालयमा प्रधानमन्त्री केपी शर्मा ओलीलाई उक्त रकम हस्तान्तरण गरेका हुन ।
बिज्ञापन
बैंकका प्रमुख कार्यकारी अधिकृत देवेन्द्ररमण खनालले संस्थागत सामाजिक उत्तरदायित्वअन्तर्गत सहयोग गरिएको जानकारी गराए । यस्तै नेकपा एमालेले बाढीपहिरो प्रभावितका लागि कोषमा ५० लाख रुपैयाँ जम्मा गर्ने निर्णय गरेको छ ।पार्टी अध्यक्ष एवम् प्रधानमन्त्री केपीशर्मा ओलीको अध्यक्षतामा आज बबरमहलस्थित होटल बसेरामा बसेको एमाले सचिवालय बैठकले उक्त निर्णय गरेको छ ।
यस्तै भाटभटेनी सुपरमार्केटका प्रबन्ध निर्देशक मीनबहादुर गुरुङले राष्ट्रिय विपतमा १ करोड ११ लाख ११ हजार एक सय ११ रुपैयाँ प्रदान गरेका छन् । उक्त रकम बराबरको चेक गुरुङ दम्पतिले हिजो बेलुकी बालुवाटार पुगेर प्रधानमन्त्री केपी शर्मा ओलीलाई हस्तान्तरण गरेको र सो रकम कोषमा जम्मा गरिने बताइएको छ ।
बिज्ञापन
