सरकारको पूँजीगत खर्च निराशजनक देखिएको छ । हिजोसम्ममा ५२ दशमलव २ प्रतिशतमात्र पूँजीगत खर्च भएको छ । महालेखा नियन्त्रक कार्यालयका अनुसार ८० दशमलव ९३ प्रतिशत चालु खर्च र ७८ दशमलव ३६ प्रतिशत वित्तीय व्यवस्था खर्च भएको छ ।
मन्त्रालयगत रुपमा हेर्दा पूँजीगत खर्च सबैभन्दा निराशजनक देखिएको छ संघीय मामिला तथा सामान्य प्रशासन मन्त्रालयमा । उक्त मन्त्रालयको पूँजीगत खर्च १० प्रतिशतभन्दा कम छ ।महालेखा नियन्त्रकको कार्यालयका अनुसार सबैभन्दा कम खर्च गर्नेमा संघीय मामिला तथा सामान्य प्रशासन मन्त्रालय छ । सबैभन्दा बढी खर्च गर्नेमा रक्षा मन्त्रालय छ ।
बिज्ञापन
संघीय मामिला तथा सामान्य प्रशासन मन्त्रालयललाई चालु आर्थिक बर्षमा २३ करोड ४४ लाख विनियोजन भएकामा २ करोड २१ लाख ३४ हजार रुपैयाँ मात्र खर्च भएको छ ।
यस्तै रक्षा मन्त्रालयले भने कूल पूँजीगत बजेटको ८१ दशमलव ७२ प्रतिशत खर्च गरेको छ । मन्त्रालयलाई चालु आर्थिक बर्षमा पूँजीगत तर्फ ५ अर्ब ६७ करोड १२ लाख बजेट विनियोजन गरिएकोमा आइतबारसम्ममा ४ अर्ब ६५ करोड खर्च गरिसकेको छ । यो कूल पूँजीगत खर्चतर्फ विनियोजन गरिएको वजेटको ८२ प्रतिशत हो ।
बिज्ञापन
महालेखाका अनुसार महिला बालबालिका तथा ज्येष्ठ नागरिक मन्त्रालयको पूँजीगत खर्च ११ प्रतिशत,सञ्चार तथा सूचना प्रविधि मन्त्रालयको १२ प्रतिशत,उद्योग मन्त्रालयको १७ प्रतिशतमात्र खर्च गर्न सकेका छन् ।
विकासे मन्त्रालय भनिएका सहरी विकासको ४८,भौतिक पूर्वाधारले ६० प्रतिशत,उर्जा मन्त्रालयले ६९ प्रतिशत पूँजीगत तर्फ विनियोजन बजेट खर्च गरेका छन् ।
यता महालेखा नियन्त्रक कार्यालयको तथ्यांकलाई आधार मान्ने हो भने चालु आर्थिक बर्षका लागि विनियोजित बजेटको ३० प्रतिशत हाराहारी बजेट फ्रिज हुने देखिएको छ । आजसम्मको स्थिति हेर्दा विनियोजित १७ खर्ब ५१ अर्ब ३१ करोड बजेटको ६८ दशमलव ०९ प्रतिशत खर्च भएको छ ।
बिज्ञापन
