कैलालीमा कार्यरत एक डिभिजनल वन अधिकृतलाई मुख्यमन्त्रीविरुद्ध दिएको अभिव्यक्तिका कारण विद्युतीय अपराधसम्बन्धी मुद्दामा प्रहरीले नियन्त्रणमा लिएको छ।
बिज्ञापन
कैलालीको उद्योग, पर्यटन, वन तथा वातावरण मन्त्रालयमा कार्यरत डिभिजनल वन अधिकृत कृष्णदत्त भट्टलाई सोमबार (चैत २) जिल्ला प्रहरी कार्यालय कैलालीको टोलीले पक्राउ गरेको हो। प्रहरीका अनुसार उनलाई मन्त्रालय परिसरबाटै नियन्त्रणमा लिइएको हो।
जिल्ला प्रहरी कार्यालय कैलालीका प्रवक्ता तथा डीएसपी योगेन्द्र तिमिल्सिनाले सुदूरपश्चिम प्रदेशका मुख्यमन्त्री कमलबहादुर शाहका स्वकीय सचिव प्रयागराज खनालले दिएको उजुरीका आधारमा भट्टलाई पक्राउ गरिएको जानकारी दिए। खनालले भट्टविरुद्ध विद्युतीय अपराधसम्बन्धी कसुरमा जाहेरी दिएका थिए।
बिज्ञापन
प्रहरीले पक्राउपछि भट्टलाई जिल्ला प्रहरी कार्यालय कैलालीको हिरासतमा राखेर थप अनुसन्धान अघि बढाएको जनाएको छ।
यसअघि भट्टले केही सञ्चारमाध्यमलाई दिएको अन्तर्वार्तामा मुख्यमन्त्री शाहले आफूबाट पाँच लाख रुपैयाँ घुस मागेको र रकम नदिएपछि पूर्वाग्रह राख्दै सरुवा गरिएको आरोप लगाएका थिए। उक्त अभिव्यक्तिपछि उद्योग, पर्यटन, वन तथा वातावरण मन्त्रालयले उनीसँग स्पष्टीकरण मागेको थियो।
सोही स्पष्टीकरण बुझाउन मन्त्रालय पुगेका बेला प्रहरीले उनलाई नियन्त्रणमा लिएको बताइएको छ। घटनापछि प्रदेश सरकार र प्रशासनिक वृत्तमा यसको चर्चा चुलिएको छ।
बिज्ञापन
